Caso di e hobennan cu ta bati homber, ta den man di polis

ORANJESTAD – Caso di maltrato di dos hoben contra un adicto ambulante ta den man di polis. Asina vocero suplente di polis, Liliana Rasmijn, a confirma diaranson mainta. Segun Rasmijn, Cuerpo Policial ta na altura di e video, cu ta circulando riba e rednan social, unda 2 hoben lo a maltrata un adicto ambulante. “Cuerpo Policial su departamento di JZP ta atendiendo cu e caso aki desde ayera conhuntamente cu Ministerio Publico, cual ta esun cu ta guia tur investigacion penal,” Rasmijn a sigui bisa. Manera NoticiaCla.com a raporta for di diamars atardi, un video cu ta circula ta mustra cu dos hoben di scol ta bati e homber malamento cu palo y ta tira obheto riba dje. 

E CASO

Un video cu a aparece diamars atardi riba e rednan social di dos hoben batiendo un persona adicto ambulante cu palo, ta creando rabia den comunidad. Ta trata di un alumno di EPB San Nicolas y un alumno actual di Paulus school na San Nicolas, cu a hinca e homber den un skina di un edificio bandona pariba di e scol menciona. Un di nan ta den 6e klas y tin loke ta parce, su uniform di scol bisti ainda y e otro tin e uniform di EPB San Nicolas. Nan ta dal e homber y tir’e cu palo tambe, mientras cu e homber ta sclama pa nan stop. E edificio bandona ta ex Prinses Christina school, cu ta net pariba di Joe Laveist Ballpark.  Esaki sigur ta crea indignacion pero na mesun momento ta un señal hopi cla tambe, con nos muchanan ta anda cu otro hende. Awe ta un adicto ambulante y mañan por ta un hende grandi of hasta otro mucha. Ta di compronde cu mester ta rabia cu e muchanan, pero di otro banda, mester puntra mesora kico ta loke a pone nan haci e acto aki y unda educacion di cas a keda? NoticiaCla mientrastanto a compronde cu e scolnan respectivo a reacciona caba y a cuminsa cana e paso necesario. Potretnan ta screenshot di e video cu ta circulando.