E trahadonan na Corsou di Ontvanger, Inspeccion y BAB den incertidumbre despues di candela

WILLEMSTAD- E trahadonan di Ontvanger, Inspeccion y BAB ta den incertidumbre, despues di e candela intencional na kantoor di Ontvanger. Esaki ta loke a resalta ayera den reunion informativo cu sindicato ABVO a tene cu e trahadonan.

Den declaracion pa EXTRA, sr. Marlon Manuela cu a guia e reunion cu e trahadonan ayera mainta na ABVO a bisa cu tabatin alrededor di 200 empleado, casi tur trahado tabata ey.

E puntonan di agenda tabata situacion, despues cu Ontvanger a kima, reorganisacion y tambe a trata e punto di agresion cu tabatin den fin di siman cu un trahado di BAB.

Sr. Manuela a declara cu nan a duna informacion na trahadonan di e reunion cu ABVO tabatin cu gobierno dia 27 augustus ultimo.

Loke a bin hopi fuerte dilanti cu e trahadonan ta den incertidumbre for di despues dje candela, pasobra nan no ta hayando informacion di gobierno, no sa kico tin di haci, nan kier continuacion di servicio. E trahadonan, algun ta na cas, no ta tende nada, mientras aki aya a reparti e trahadonan pa por duna servicio.

Pero e trahadonan ta corda cu mester saca grondbelasting, e notarionan tin di atende esaki y tur otro trabou, tur cos ta kedando keto. Niun hende ta informa e trahadonan si ta kedando cla cu un edificio si of no.

Di otro banda e trahadonan ta bisa, cu cualkier luga cu gobierno kier bin cu ne, nan kier envolvimento di ABVO den esaki pa “screen” e luga pa e ta bon. E trahadonan di nan banda tambe ta buscando luga.

Pa loke a trata reorganisacion, gobierno ta reorganisando henter seccion di belasting, caminda servicio di Ontvanger, Inspeccion y BAB, ta bay bou di un dak.

“E plan ey tabat’ey hopi aña caba y tabata wanta y awor si ta canando pa finalisa. Door di situacion di candela, e cosnan a wanta. Pero nos ta spera cu e siman aki, e documento di reorganisacion ta yega ABVO y pa keda cla”, Manuela a bisa.

E palabracion tabata cu un dado momento cu ABVO tin di bay gobierno pa trece inkietud y recomendacion di e trahadonan pa gobierno. Lo pidi gobierno pa busca manera pa papia cu e trahadonan y ABVO su sede ta habri. Hopi trahado ta na cas sinta, sin sa kico pa haci.

Por ultimo a papia cu e trahadonan riba e situacion cu a agredi un ambtenaar, pasobra e lo a cera un negoshi. No por sali bisa cu esaki of esaya ta e solucion. Nunca prome a conoce un situacion cu ta busca luga pa kima, cu ta agredi ambtenaar. Polis a detene a agresor mesora, pero mester ta alerta y e trahadonan kier pa gobierno informa nan di un ke otro.