Minister a atende critica riba accion preventie fouileren di weekend

ORANJESTAD - Minister di husticia Arthur Dowers a atende cantidad di critica riba accion preventie fouileren di weekend, dialuna den un conferencia di prensa. El a splica cu e medida aki ta uno pa aumenta siguridad na Aruba y ta un señal cla pa esunnan cu ta kibra ley y ta causa y contribui na situacionnan incomodo y insigur na nos isla.

Anteriormente tabatin e medida di preventief fouilleren pa arma di candela, pero desde algun aña pasa a añadi tambe preventief fouilleren pa droga. “Preventief fouilleren riba droga t’esun cu mester duna e señal caminda cu bo kier mustra na hendenan den comunidad cu ta sinti cu nan por tuma un dominio di cierto partinan, cierto teritorionan na e pais aki y haci y deshaci manera nan ta haya ta bon, cu esey no ta wordo acepta den nos comunidad”, asina Minister Dowers a subraya.

El a splica cu den fin di siman den palabracion cu Ministerio Publico, Cuerpo Policial di Aruba y Ministerio di Husticia, polisnan a sali cu un accion di preventief fouilleren pa droga, unda cu Rechter Commissaris a acorda pa añadi preventief fouilleren pa arma di candela. E mandatario a bisa cu e accion aki a duna bon resultado y ta di lamenta cu keto bay ta haya personanan cu arma y droga y tambe a haya un cantidad grandi di persona sin permiso pa legalmente por ta na Aruba y tambe otro personanan haciendo cosnan ilegal.

Minister Dowers a gradici comunidad pa e comprension. El a splica cu aunke tin hende cu ta experencia preventief fouilleren como algo fastioso, e accionnan aki necesario y ta pa sigura cu ora cu e mayoria di hende ta sali pa diberticion no tin otro hende cu ta forma un peliger pa nan pasobra nan ta carga arma of nan tin intencion menos bon. Preventief fouilleren ta un medida pa aumenta siguridad na Aruba y pa reduci risico pa miembronan di nos comunidad no wordo afecta pa esunnan cu ta carga arma ilegal of ta sali bende droga y ta atrae situacionnan insigur.

Corte Europeo di Derecho Humano ta permiti accionnan manera esunnan cu ta tumando luga y no ta permiti pa tin “seleccion” of “profiling” di hende, pues pa e motibo aki mes, tur hende cu ta den e area di accion lo wordo envolvi den e accion. E areanan unda cu e accion di preventief fouilleren ta tuma luga ta areanan di risico. Tin indicacion basa riba rapportnan y observacionnan cu tin bendemento di droga tumando luga of cu tin personanan cu ta carga arma. E dos factornan aki hopi biaha ta bay man-den-man tambe.