Corte: FLPD mester tuma Di Stefano Wernet bek na trabou

ORANJESTAD – Despues cu e partidonan no a logra yega na un acuerdo mutuo, huez a dicta sentencia, den e caso cu Di Stefano Wernet a entama contra directiva di Fundacion Lotto Pa Deporte (FLPD) recientemente. Wernet a informa corte dia 2 di augustus cu no por a yega na otro, manera cu huez a pidi. Como tal, huez a ordena FLPD pa paga Wernet su salario atrasa for di januari 2019 y tum’e bek na trabou y permitie eherce su trabou como director. Si e ultimo aki no sosode, FLPD tin cu paga un multa di 1000 florin pa dia te un maximo di 100 mil florin.

CASO

Den e sentencia di 11 pagina, Corte ta specifica e sentencia na fabor di Wernet y ta mustra FLPD riba su fayonan cometi. Entre nan, tur e puntonan cu e fundacion a mustra pa cual a retira Wernet, ‘op staande voet’ na april di e aña aki, despues cu a suspende y prolonga e suspencion algun biaha. Corte a desbarata e lista di punto di FLPD contra Wernet y a mustra cu no por a prueba cu tabatin un motibo valido pa retir’e ‘op staande voet’. Como tal a ‘destrui’ e decision di e fundacion y como tal mester tuma Wernet bek na trabou. Lesa e sentencia completo AKI.