Prome Minister Wever a felicita tur miembro di prensa riba nan dia

ORANJESTAD - Prome Minister di Aruba a habri su conferencia di prensa dialuna mainta felicitando tur miembro di prensa riba Dia Internacional di Prensa. 

“E tarea di un periodista, pa tene comunidad informa tur momento, no ta uno facil. Aruba ta un isla democratico, na unda cu libertad di expresion ta un derecho fundamental di cada persona cu mester wordo trata cu hopi cautela. E poder di e derecho aki ta den man di cada un persona y mas nos cuid’e y proteg’e, mas tempo nos por haci uzo di dj’e”.

“Ta conoci cu cierto pais, cu a abusa y maluza nan derecho di expresion a perde y esaki definitivamente ta algo cu pais Aruba lo kier evita. Ta hopi importante pa protega e derecho aki y mi ta pidi encarecidamente pa cuid’e, protheh’e, defend’e y trat’e cu cautela p’asina por sigui informa comunidad miho cu ta posibel, pasobra un comunidad bon informa ta un comunidad cu por tuma miho decisionnan”.

Trabou di prensa no ta uno facil mirando cu nos ta un isla chikito y no ta tur ora ta di acuerdo cu e noticianan cu ta publica den prensa, pero importante ta cu e noticia ta ser duna cu respet y transparencia pa e pueblo por wordo beneficia”, ta e mensahe di Prome Minister en conexion cu Dia Internacional di Prensa.