Consehero World Wildlife Fund Netherlands a fortifica lazo cu e instancianan di Aruba

ORANJESTAD – Recientemente durante un bishita cortico, Sr. Arjan de Groene, consehero di “World Wildlife Fund Netherlands” (WWF-NL) a reuni cu varios persona y entidad clave, entre nan, su Excelencia Gobernador di Aruba, Sr. Alfonso Boekhoudt, Directie Natuur & Milieu, Universidad di Aruba, y tambe Fundacion Parke Nacional Aruba (FPNA) cu tabata encarga cu e programa di bishita di Sr. De Groene.

E contacto cu Sr. De Goede tabata estableci door di Sra. Hellen van der Wal, miembro di e hunta di supervision di FPNA, kende porcierto ta apunta recientemente como president di “Dutch Caribbean Nature Alliance” (DCNA), unda su enfoke ta, pa mantene e islanan cu ta partner cu DCNA esta, Curaçao, Bonaire, St. Maarten, Saba, St. Eustatius y Aruba, uni y conecta cu e partnernan internacional. Durante su bishita, Sr. De Groene lo sondia e posibilidadnan pa conecta Aruba tambe cu e 8 obhetivonan cu ta central den e organisacion di WWF-NL, asina formando un base igual cu e otro islanan.WWF-NL ta sostene un medio ambiente sano pa tur hende, enfocando riba un total di 8 obhetivo global, cu mira pa un cambio den biodiversidad prome cu aña 2030. E 8 obhetivonan global di WWF-NL ta: “Wildlife, Ocean, Forests, Food, Climate, Freshwater, Biodiversity, Man and Behavior”.

Segun Sr. De Groene, WWF-NL ta traha principalmente riba e islanan di Bonaire, St. Eustatius y Saba, ya cu naturalesa no conoce barera el a acepta e invitacion di DCNA hunto cu FPNA, pa asina conoce diferente organisacion, persona y proyecto na Aruba. “Aunke tur isla ta diferente, e problemanan y por lo tanto e solucion na e problemanan aki ta hopi comparabel. E situacion riba tur isla encuanto coral y e poblacion di pisca ta alarmante, pa cual lo mester coordina e desaroyo economico y conservacion di nos naturalesa den un manera balansa. Nos partnersnan riba e otro islanan por siña hopi di Aruba su conocemento y experticio, sin laga afo cu Aruba tambe por siña hopi di e otro islanan. E ehempelnan clave ta restoracion di flora, planificacion di Parke Marino, reduci e cantidad di plastic, colaboracion pa entre otro; sondeo cientifico y hopi mas. Cu mi bishita mi ta spera di por descubri e rol cu WWF-NL por tin den e proceso aki”.

Durante e luna di october DCNA lo sigui fortifica e laso entre e islanan, unda cu lo tin varios presentacion y workshop na Boneiro. Adicionalmente lo tin un “Junior Ranger Exchange” organisa pa DCNA en collaboracion cu FPNA y Stinapa, subsidia dor di WWF-NL, Rabobank, Stinapa y DCNA, unda e Junior Rangers di tur e isla lo bini hunto, pa asina toca e tema di conservacion di nos bida marino y nos costanan.