AHATA a organisa seminario ‘Happy Nature, Happy Island’

ORANJESTAD - Aruba Hotel & Tourism Association (AHATA) a organisa un seminario pa su miembronan, cu ta ofrece recorido den naturalesa na nos bishitantenan. Hunto cu Aruba Excellence Foundation y Fundacion Parke Nacional Aruba a crea “Happy Nature, Happy Island” specialmente pa e guianan di diferente compania. E obhetivo di e seminario tabata pa inculca orguyo, conocemento y compromiso pa preservacion di nos recursonan natural. Cu e seminario aki a toca e tema di e preocupacion cu nos comunidad tin pa cu e recoridonan y nan efectonan den nos naturalesa. E participantenan a ricibi informacion di e balor fundamental di nos naturalesa y a explora e maneranan pa trata naturalesa den un forma sostenibel. A pone enfasis riba e nececidad pa ofrece recreacion sostenibel cu conscientisacion di e balor di nos recurso natural.

Pionero local den Turismo Sostenibel, Sr. Ewald Biemans di Bucuti & Tara Beach Resort a haci apertura di e seminario, bisando cu “Aruba su economia no ta basa riba Turismo, Aruba su economia ta basa riba Naturalesa - sin nos naturalesa, no lo tin Turismo”. E ta evidente cu nos naturalesa mester di cuido y proteccion pa sigura cu e t’ey pa e siguiente generacionnan.

Aruba Excellence Foundation y Fundacion Parke Nacional Aruba a duna presentacion amplio y interactivo riba con pa cuida nos naturalesa. A discuti riba e concepto di conservacion di naturalesa y comprende e importancia di recreacion sostenibel. Tambe pa compronde Aruba su biodiversidady identifica e maneranan pa contribui na su conservacion y pa motiva e participantenan, pa ta aliado di perservacion di naturalesa. Nos bishitantenan y nos residentenan mester coopera den e esfuerso aki.

E companianan miembro di AHATA cu a participa tabata:

Action Tours Aruba, De Palm Tours, EL Tours, Fofoti Tours & Transfer, Pelican Adventures, Barbulet Concierge, y Colegio EPI Unit Hospitality & Tourism.

AHATA ta gradici e anfitrion Aruba Marriott Resort y tur e miembronan, cu a participa activamente den e seminario importante aki y a mustra nan compromiso na e sostenibilidad di nos isla su areanan natural. Danki na Aruba Excellence Foundation y Fundacion Parke Nacional Aruba pa un programa interesante y relevante.