Presupuesto Sociaal Crisis Plan ta keda un problema pa CAFt

ORANJESTAD – E presupuesto di Sociaal Crisis Plan (IBSCP) ta keda un problema pa e Colegio di Supervision Financiero di Aruba (CAFt). Den nan reaccion di 9 pagina riba e di raportahe di e di dos cuartal di gobierno su finanzas cu a keda publica dia 2 di september 2019, nan ta duna un bista basta positivo, cu cos ta canando, pero ta keda pega na e asunto di IBSCP, particularmente e parti di personal. Minister di finanzas diamars mainta, Xiomara Maduro, a mustra cu enberdad ta keda un diferencia di opinion entre CAFt y gobierno riba e tema ey. 

PROBLEMA

E diferencia di opinion ta cu CAFT ta haya cu e gastonan di personal manera financia den e IBSCP, ta e gastonan di personal di pais Aruba y como tal mester ta parti di e presupuesto general. Gobierno (lesa: minister Maduro) ta bisa cu no, pasobra a presenta e presupuesto caba na parlamento cu un cierto suma y como tal no por presenta un otro suma awor. Segun CAFT, IBSCP mester ta hinca den e 479 miyon plafond di gasto di personal, pero gobierno ta pensa, cu e mester ta separa. Esey ta un di e varios diferencianan di opinion cu tin entre CAFt y Gobierno. 

FONDO CU FALTA

Un di e intencionnan di gobierno pa introduci Sugar Tax na juli di e aña aki, a cay afo y awor ta mand’e pa januari 2020, como e di dos parti di introduccion di e reforma fiscal. Solamente cu ainda no a determina kico exacto e formato lo ta pa cobra. E hecho ta si, cu door cu no a introduci e tax aki, ta bay keda un ‘buraco’ di 16.7 miyon cu mester saca di un caminda segun CAFt. E mandatario a bisa diamars mainta cu e siman aki durante reunion cu stakeholders, lo trata e tema ey. 

POSITIVO

Positivo ta cu segun CAft, a base di e di dos raportahe di ehecucion di finanzas, e ta cuadra den liña grandi cu presupuesto 2019.  E pensamento di gobierno segun CAft ta, cu e saldo financiero di e sector colectivo total di 2019 lo yega na un deficit di 19.5 miyon, cu ta cuadra cu e deficit di 0.4%A di e PIB. “A base di esaki tin e speransa, cu lo yega na e norma palabra di un deficit maximal di 0.5% di BIP” CAFt ta bisa. Loke si nan ta ilustra ta cu tin risico cerca e entrada di dividendo y impuesto, cu mester maneha activamente, segun e Colegio di Supervision Financiero. Lesa e rapport completo AKI.