Homber asesina dialuna na Corsou tabata criminal conoci na Hulanda

WILLEMSTAD.- E homber cu a keda asesina na Corsou dialuna mainta, a resulta di ta un criminal conoci na Hulanda, cu un biaha a scapa di e intento na Almere Hulanda, pero dialuna su number a hunga. Ta trata di e homber Genciël Recbel Joshua Feller cu dialuna mainta a keda asesina riba Caracasbaaiweg. Tabata alrededor di dies or di mainta cu Central di Polis a ricibi yamada di e caso di tiramento cu a tuma luga.

INVESTIGACION PRELIMINAR 

For di investigacion preliminar a sali na cla, cu dos homber a yega na e sitio y a cuminsa los e tironan, dirigi riba e homber, cu tabata sinta na e banda di pasahero den auto. For di video di camara di seguridad cu ta circula, por a mira claramente, cu e hombernan tabata cara tapa y tabatin blusa blanco y e otro blusa colo cora bisti. Tur dos a bini for di e mesun direccion, pero uno a enfrenta e homber di dilanti y e otro di patras.

E auto cual tabata maneha pa un dama den cua e victima tabata sinta aden como ocupante, tabatin varios perforacion di bala. Despues di nan acto, e sospechosonan a bandona e sitio, te asina leu cu tabata visibel, na pia. Dokter di polis cu a yega na e sitio a constata morto di e homber; Genciël Recbel Joshua Feller, naci na Hulanda dia 3 di november 1995. Pues un hoben di apenas 23 aña di edad.

For di locual por a compronde for di su fuentenan, hustamente algun siman atras lo a basha bala riba e homber aki na Almere, Hulanda debi na cierto problema cu e lo a hay’e aden. E dia ey a homber a scapa y a logra bin Corsou.

Riba ordo di fiscal di Ministerio Publico a confisca e curpa sin bida y e auto pa mas investigacion. Investigacion den e caso aki ta continua.

Cuerpo policial ta haci un suplica na tur ciudadano cu tin informacion tocante di loke a tuma luga relaciona cu e caso aki, pa tuma contacto cu polis na 917 of e liña anonimo 108.

Cortesia Extra .