Si minister no tuma decision conforme sentencia, corte lo impone multa

ORANJESTAD – Si dentro di tres luna, minister no tuma un decision riba un peticion haci pa un compania pa un consesion, e por costa pais Aruba hopi placa. Despues di varios intento, ainda gobierno di Aruba a haya un otro sentencia den su contra, pa loke ta tumamento di decision pa un proyecto di telecomunicacion. Despues cu un otro compania recientemente tambe a trata nan caso den corte pa algo similar, awor ta trata uno otro ‘bieu’, cu tambe a pidi huez ordena gobierno (lesa: minister di Telecomunicacion) pa tuma un decision. Den e caso aki ta trata e compania comercialmente yama Digicel Aruba, cu a pidi pa concede dos concesion adicional, pero cu minister no kier contesta. 

E CASO

Pa e compania, a haci e peticion na mei di 2016 pa dos concesion adicional, di cual uno tabata pa opera un network di fiber optics y e otro pa tin un cabel submarino, pa expande e capacidad di internet via broadband. Otro compania tambe a haci mesun peticion y aki tambe e minister ta nenga di tuma decision. Na 2016, e minister di Telecom no a tuma decision. Na 2017 corte a ordena e mandatario pa tuma un decision den tres luna di tempo. Pero ni asina e minister no a tuma decision. Na juni 2018 atrobe a pidi corte pa forza e minister pa tuma un decision. E biaha aki e diferencia ta, cu huez a impone un multa cuantioso, si despues di e tres lunanan aki no cumpli. Falta di decision por costa pais Aruba casi mey miyon total, pa falta di duna contesta. No ta conoci pakico gobierno no ta tumando un decision, ni esun anterior como esun actual. Lesa e sentencia AKI.