Horcan masivo Dorian ta bati Bahamas pa di dos dia sigui

BAHAMAS – E horcan catastrofico di forza 5 Dorian, pa di dos dia sigui, tabata bati e archipielago di Bahamas cu forza di biento di 200 miya pa ora, inundando e islanan ubica parti abou, cu e olanan di 23 pia. “Parti di Grand Bahama tabata azota sin misericordia, pa e forza destructivo di e biento”, National Hurricane Center na Miami a bisa dialuna. Mientrastanto na Merca, miyones di hende ta teme pa e yegada mas laat e siman aki y NHC ta bisa cu Dorian por pasa hopi cerca di e costa oost di Florida dialuna anochi. Tanto Fort Lauderdale como Palm Beach a cera nan aeropuertonan caba. Ora cu e horcan a subi tera diadomingo na Great Abaco Island, e biento tabata di 185 miya pa ora... Un record for di 1935. E problema ta, cu e horcan casi no ta moviendo y ta moviendo apenas cu velocidad di 1 km pa ora. Mas lento e move, mas destruccion e ta causa. E destruccion na Bahamas ta parce di ta masivo y lo haya sa exactamente con grandi e daño ta, despues cu e horcan caba di pasa.