Gladys Knight y Maroon 5 a cera CNSJ cu broche di oro

WILLEMSTAD – E di 9 edicion di Curacao North Sea Jazz ta tras di lomba. Mas di 10 mil hende tres dia largo a bolbe goza un sin fin di e magno evento anual, cu a bin pone Corsou mas riba mapa internacional, pa loke ta concierto profesional. Diasabra tabata e ultimo anochi di presentacion di e artistanan grandi, manera; Gladys Knight, Mariah Carey, Nicky Jam, y e bandanan, manera; Maroon 5 y Third World, djis pa ilustra algun. Cada uno tabatin su siguidor- y fanaticonan. 

E anochi a habri banda di lama, cu Third World riba e tarima di Sir Duke, mientras cu esunnan cu ta mas den e liña di jazz, a habri nan anochi mas memey den e sala Celia, unda cu e musico renombra, David Sanborn, a deleita esunnan presente cu su musica. Esun mas anticipa tabata; Mariah Carey y Maroon 5, como e artistanan comercial popular. Mariah Carey tabatin su siguidornan cu sigur a goza di su estilo unico di diva total. Asina mes, e gran mayoria no por a sconde nan desapunto, cu e no a canta e cancion popular di Pasco, aunke cu su presentacion di Hero, sigur a kita hopi di e tristesa ey. A sigui esun mas comenta cu tabata Maroon 5, cu su artista principal Adam Levine, e biaha aki cu su look di Mohawk blond. For di comienso te final, cu e repertorio popular, el a sa di gara e publico for di un comienso y a wanta e momentum te final. Sigur pa hopi, e exito di anochi. Y pa cera e anochi, e artista popular di Reggaeton, Nicky Jam, a presenta su repertorio popular banda di lama. Visualmente contento, el a hacie un punto tambe pa gradici Corsou multipel biaha y particularmente gradici e colonia Latino residencia na Corsou. E publico grandi a goza te na e ultimo letra y tono di su presentacion. E interesante tabata su reaccion ora cu el a lesa y haya sa di e alineacion di artista y cu e tambe tabata parti di dje. "Mi tabata entre maroon 5 y otro grandinan. wow!" Nicky Jam a bisa spontaneamente. Finalmente a goza di e ciere oficial tradicional di Curacao North Sea Jazz, cu un show di vuurwerk grandioso, cu ta indica cu ‘its over’ y cu ta sigui otro aña, cu tin cu bira e di 10 aniversario. Notabel atrobe tabata esun responsabel pa tur cos, e inversionista y comerciante Gregory Elias, cu a trece e concepto popular pa Corsou 9 aña pasa y cu a convirtie den e evento mas grandi di aña pa Corsou y porta te hasta Caribe. Elias mes tabata varios biaha den publico, disfrutando keto keto y percurando pa tur cos cana bon. Mescos cu tur hende, e tambe tin su faboritonan y chiki chiki, tabata mustra su alegria cu e presentacion di algun di e artistanan aki. Pabien un biaha mas Corsou!