Kenny G, Micheal McDonald y Pitbull tabata grandi na CNSJ 2019

WILLEMSTAD – E ‘prome’ anochi official di e di 9 edicion di Curacao North Sea Jazz Festival a cuminsa cu e ‘bang’ cu e ta acostumbra di dje, cu presentacion di e conocido mr 305, esta Pitbull. Su forma di presenta, a gara tur hende di comienso di e festival y cuminsa tur cos riba bon pia. Compara cu e dia anterior unda cu tabatin problema cu trafico stagna, esaki no tabata un ‘issue’ diabierna mas ya cu organisadornan a resolve e problema rapidamente. E artista cu a haya hopi respet y admiracion tabata, no pa su musica pers’e’, sino pa su dominio casi ‘perfecto’ di Papiamento tabata Kenny G. Loke a inicia como un simple ‘cumindamento’, a haya suficiente confiansa pa desemboca den un presentacion completo di su prome dos cancionan. Algo cu e publico a aprecia masha hopi mes. Prome cu esey, el a acapara atencion inmediato cu su ‘stunt’ di para mei mei di e publico, y despues demonstra su abilidad di ‘supla’ su instrument mientras el a cana full rond den e sala, sin un biaha mester hala rosea bek. Unabez riba scenario bek, e tabata presenta su exitonan un tras di otro. Damanan tabata sinta completamente entrega ta wak su presentacion. Otro banda di e area, riba e tarima banda di laman (Sir Duke), Inner Circle tabatin un otro publico hopi grandi den su gara. Un tras di otro, reggae y otro tipo di musica tabata zona. Bek pa e tarima principal, e legendarionan di musica soul, Earth Wind & Fire tabata bek riba Sam Cooke, despues cu 8 aña pasa nan a sa di cende e mecha di e fiesta di disco di e tempo ey. E cabez awor di e banda, Phillip Bailey (68) a mustra pakico nan tabata e grandinan ainda hunto cu Verdine White y Ralph Johnson como e front. 

A sigui e legendario Michael McDonald como solista riba Celia Stage, ex integrante di e banda The Doobie Brothers, cu a cuminsa cu un version diferente di e cancion popular ‘Ya Mo Be There’. Uno cu a dal duro, tabata ‘What a fool Believes’. Bek pa Sir Duke, tabata momento pa e presentacion di Maxwell, cu ta wordo considera e ‘Marvin Gaye’ di añanan 90. Otronan ta yame e siguiente Prince. Y pa finalisa e anochi, e grandinan di hiphop Black Eye Peas cu for di comienso a pone tur hende bay den trans cu nan salida y a wanta esaki te na final cu nan exito mas popular localmente, I gotta Feeling cu cual nan a cera nan presentacion. Sigur un anochi grandi, cu a duna algo pa tur hende. E lineup pa diasabra ta uno grandi atrobe, Cu artistanan manera David Sanborn, Third World, Mariah Carey, Gladys Night, Maroon 5 y Nicky Jam. E anochi un biaha mas ta cuminsa pa 7’or di anochi.