Rijksministerraad: Aruba tin te dia 20 di september pa presenta un plan

DEN HAAG – Gobierno di Reino Hulandes a duna gobierno di Aruba te dia 20 di september, pa presenta un plan alternativa pa resolve su asuntonan financiero. Por lo menos, asina gobierno di Aruba a informa den un comunicado diabierna mainta. Diabierna Rijksministerraad a trata e cambio di ley di LAFt y aki ta unda cu segun Minister Plenipotenciario pa Aruba na Hulanda, Guilfred Besaril, Aruba a haya mas tempo. ‘Aruba y Hulanda ta den dialogo, Aruba a haya mas tempo’, e titulo di e comunicado di gobierno di Aruba ta bisa. Mas aleu, ta menciona fecha di 20 di september como e proximo reunion di RMR pa trata e tema atrobe. E intencion segun Besaril ta, pa e presenta un plan alternativa na RMR y e ora e decision cay di Hulanda, si ta acepta of no.

E DEADLINE

Manera conoci, awe (diabierna) tabata e ‘d-day’ pa Aruba, ora cu RMR trata e cambio di ley di LAFt. Hulanda di comienso a rechasa e cambio di ley di LAFt, manera cu Parlamento di Aruba a aproba dia 6 di juni ultimo. Parlamento di Aruba no a haci cambio y a para riba cu e version inicial (esun acorda entre e gobiernonan di Aruba y Hulanda) tabata no constitucional. A duna gobierno di Aruba dia 5 di juli (e ultimo RMR prome cu recess di zomer) te cu 30 di augustus, pa sigui trata esaki y wak kico Aruba ta bin cu ne. Pero Aruba no a presenta nada concreto, sino mas bien a duna splicacion mas amplio riba e situacion cu e ta aden y kico nan ta haciendo pa remedia e situacion. Awor si Aruba mester bin cu un plan concreto, pa cual Hulanda lo a duna Aruba te e siguiente reunion, cu ta 20 di september awor.