Total di 11 compania interesa pa destaho di proyecto di desperdicio di sushi

ORANJESTAD – Tin un total di 11 compania interesa pa destaho pa maneho di desperdicio. Asina ministerio di infrastructura a informa diahuebs. Segun e oficina, na varios ocasion a reuni cu e comision fiho di Parlamento, pa loke ta trata medio ambiente y infrastructura, caminda a duna un exposicion completo di e proceso, cu ta andando na e momento aki pa loke ta trata maneho di desperdicio di sushi. Den e ultimo reunion cu comison fiho di Parlamento, e ministerio conhuntamente cu e expertonan di WEB, cu ta guiando e proceso di Waste of Energy Plant, cu na e momento aki ta bezig cu ne, den un asina yama; ‘limited tendering’, caminda tin 11 compania cu ta participa. 

Despues di e destaho publico cu a tene, esaki no a produci e ofertanan cu a spera, pero basa riba e preguntanan cu tabata tin di e companianan y despues cu a aclaria varios di e preguntanan, awor tin 11 compania. E siman aki lo reuni cu tur y como mandatario encarga, ya caba a notifica parlamento cu tin reunion cu e tecnical team, cu a lanta basa riba e national task force cu a crea na 2018. Tur 11 compania ta mustra interes grandi pa toch entrega un oferta, pa e maneho di desperdicio di sushi den forma di entre otro; Wast of Energy Plant y esey ta tumando luga na e momento aki. 

Tambe a splica parlamento e proceso profesional cu a tuma luga, caminda e decision di gobierno no ta basa riba e kier di un pensamento di un minister of gobierno. Pero esaki ta basa riba e estudionan hopi extenso, cu a haci door di un task force na cuminsamento di 2018, cu tabata inclui tur departamento di gobierno cu no solamente ta cay bou di ministerio, pero tur cu ta envolvi den henter e proceso. Nan ta DVG y dos sindicato envolvi den e Task force, gremio comercial ATIA tambe e fundacion di esunnan cu ta biba rond di Parkietenbos, TNO, PAHO, e instancianan internacional y WEB mes, cu a guia henter e proceso. 

For di e proceso ey a sali pa haci un ‘request for information’, pa haya mas informacion tocante cua ta e caminda cu gobierno mester cana, pa loke ta trata maneho di desperdicio di sushi y eynan 27 compania a participa. E companianan a bisa, cu e miho caminda pa bay, pa tin un incinerator pa tin un ‘waste of energy plant’ pa introduci coriente y basa riba esey a bay un destaho publico. Esaki ta un proceso hopi largo cu hopi estudio y e direccion cu ta bay e momentonan aki, ta e direccion corecto. E proceso ta canando y aki a mustra cu gobierno ta garantisa den e caso aki cu maneho di desperdicio di sushi ta determina door di maneho di gobierno. 

Tambe a garantisa e companianan, cu tur sushi cu recoge, si ta compania priva of di gobierno, ley existente ta mustra cu gobierno ta dicidi, unda e sushi tin di bay. Den leynan nobo cu mester bin ta bay amplia mas riba dje y con pa atende cu e aspecto aki cu ta hopi importante na momento cu ta bay cu un tipo di destaho publico. E compania kier ta sigur cuanto sushi e tin di bay procesa y na ki prijs e por bende e energia, cu e ta produci. Ta den e fase aki ta den dje awor, pa aclaria cerca e companianan, cu ta participante. Despues di e siman aki e companianan tin 90 dia pa nan entrega nan oferta y ta spera cu e biaha aki, por aclaria tur duda of confusion, cu a crea door di un compania local, cu na cierto momento a bay bisa cu e tin derecho riba su sushi. Tambe a mustra e compania priva riba e leynan cu tin y e leynan cu lo bin. Segun e ministerio, e leynan ta garantisa e maneho di desperdicio di sushi,y e mester ta uno cu tin interes general di pais Aruba na prome luga, pero no interes di un compania priva cu ta tuma e decisionnan priva pa bienestar di su compania. Te aki, e comunicado di e ministerio.