Segun premier Wever, Richard Arends debidamente a ricibi pago di RdA

ORANJESTAD – “Parlamentario Richard Arends a wordo debidamente paga pa Refineria di Aruba (RdA) na 2016,” asina Prome Minister, Evelyn Wever, a contesta Parlamento diaranson durante tratamento di parti financiero di gobierno. “Asina por mira un biaha mas, cu e (Richard Arends) ta recuri na mentira” Wever a bisa, contestando e preguntanan di parlamentario Edgar Vrolijk riba e tema. Segun e mandatario, a paga Arends tanto na ‘titulo personal’ como via su compania (Horizon). Loke ta dudoso, ta e structura di pago cu RdA a uza e tempo ey. 

RELATO

Segun e prome mandatario, e documentonan ricibi lo ta mustra cu Arends a ricibi dos pago na 2016, cu ta cubri periodo di januari pa october 2016, pa e suma di 137 mil y 131 mil respectivamente. Ta trata di e sumanan ricibi como compania pa conseho entre otro riba negociacion di e deal cu Citgo y tambe pa conseho legal. Tur esaki, segun Wever, mientras cu Arends tabata consehero mes momento di dos minister di gabinete Mike Eman II. Ademas, Wever ta sigui bisa, riba 24 di november 2016, Arends a ricibi un pago mas personal, di 31.200 florin, pero no a ricibi esaki normal, sino como un vendor, evitando asina di tin di paga impuesto riba dje. Pues e no a aparece riba payroll. Anto segun Wever, ta net e luna (Arends a firma 1 di november pa e funcion di director financiero di RdA), cu el a firma, pa despues dia 30 di november e retira, pasobra el a bira minister. Na tur, Arends lo a cobra 299 mil florin. E pagonan pa Arends a para mesora, ora cu el a bira minister, pero despues cu el a bira parlamentario na 2017, el a bolbe haya pago, den forma di un retainer; di 2 biaha 15 mil florin y tambe 2 biaha 83 mil florin pa un trabou cu e lo mester a haci, riba peticion di RdA pa acesora e risiconan di e situacion di Venezuela cu CITGO etc. Wever ta cuestiona tur e proceso di pago straño aki y a bisa cu e investigacion forensico ta andando, y cu otro luna e investigacion lo ta cla.