Total di 60 polis den weekend riba caya a planta respet

ORANJESTAD – Un total di 60 polis den weekend riba caya a planta respet. Cu permiso di Ministerio Publico, Polisnan a tene un accion preventivo di ristamento buscando sospechosonan cu ta cana cu arma di candela den forma ilegal. E accion a cuminsa diasabra for di 6:00pm y a termina te cu diadomingo 6:00am. Por bisa cu durante e control, Polisnan a logra haci varios detencion, a topa cu arma y droga ilegal. E areanan di Oranjestad den cual a tene e accion di listramento tabata Café Capri y bicindario, Wing Hung na Ponton y bicindario, Corazon Espinado y bicindario y un zona den e cayanan di Oranjestad.

E  60 polisnan riba pia a consisti di polisnan di Departamento di Droga, Recherchenan special, Unidad di cachonan K9, unidad riba brommer, Warda nos Costa, miembronan di Cuerpo Especial Arubano encarga cu transporta di detenidonan, personal administrativo, polisnan di Mobiele Eenheid, polis adicional den Centrale Post y e polisnan di e seccion di patruya di Oranjestad. E accion tabata bou di guia di Inspector di polis, Silvio de Mey y Sub Inspector Johnny Henriquez.

Por menciona cu mayoria di e sitionan controla, a ricibi bishita di polis un of tin di nan hasta dos biaha durante e mesun anochi. Na final a haci 4 detencion pa posesion di droga, incluyendo un hoben menor di edad, unda cu e la wordo rista pa arma y a haya droga riba dje. E tabata den compania di su mayornan. A yega na acuerdo cu Fiscal di Ministerio Publico pa un multa di 200 florin, cual e mayornan a paga di biaha. A detene un chauffeur bou influencia di alcohol. A detene dos persona pa buracheria y mal comportacion. Warda nos Costa a atende no menos di 24 persona cu no por a presenta un permiso di estadia of di trabou durante e control. Tur a bay Warda di Polis pa mas investigacion.

A detene un persona na altura di Café The Paddock. Polisnan a bay para un auto pa control y diripiente un pasahero sinta patras, a sali core bay den direccion di Café The Paddock. Yegando canto di lama e sospechoso a tira un tas cu e tabatin den su poder na lama. Despues di su detencion el a declara cu e tabatin marihuana y cocaina den e tas. Mirando e forma cu e tas a zink di biaha bay fondo, a reina un sospecho cu tin algo mas den e tas eynan. Mainta tempran Polisnan Maritimo, a sambuya y a haya e tas den fondo di di lama. Den e tas a haya un pistol cu 13 bala cayente, 185 florin y un BlackBerry. E sospechoso, A.X. Erasmus, di 17 aña di edad y biba na Santa Cruz a keda cera pendiente di mas investigacion. Sub Inspector Johnny Henriquez a bisa despues di e accion cu “Nos meta ta pa mantene nos cayanan sigur. Nos ta gradici e comprension tambe di comunidad pa esaki”. Por spera mas di e tipo di accionnan asina den e simannan nos dilanti.