Premier Wever: No ta mucho cla ainda si carta manda, ta uno di retiro di Richard Arends di RdA

ORANJESTAD – No ta mucho cla ainda pa gobierno, si e loke cu Parlamentario Richard Arends a entrega e siman aki, ta un carta di retiro of no, y cu si esaki ta nifica cu no mester dun’e su retiro mas. “Awe tardi Parlamentario Richard Arends a manda mi e carta di 22 (di augustus) den un email” Prome Minister, Evelyn Wever, a bisa Noticiacla.com diaranson atardi. Pero for di su contesta (esta di Wever), tabata cla cu e (Arends), a clarifica e asunto. “E abogado y hunta di comisario  di RdA (Refineria di Aruba) lo handle e verder, y bisa si ta suficiente of si mester dun’e su retiro ainda,” Wever a sigui bisa e portal aki. 

E RETIRO

Manera e portal aki a raporta siman pasa diahuebs, Wever a declara e diahuebs mainta ey, cu si pa e diabierna ey, Arends no presenta su carta di retiro, of un prueba cu el a ‘retira’ di e contracto lucrativo firma como director financiero, e siguiente dialuna lo a duna e hunta di RdA orden, pa cuminsa proceso di retiro di Arends. Esaki pa evita cu Arends por ‘cobra’ placa riba custia di pueblo, como cu fondonan di RdA ta fondo di pueblo. Wever no ta considera loke cu Arends a haci (firma un contracto asina lucrativo segun e prome mandatario), algo eticamente y moralmente corecto. Y for di informacion di e contracto, ta mustra (segun Wever), cu Arends por cobra un suma miyonario, si retir’e for di e funcion. Si Arends enberdad a retira, e ora pueblo ta scapa di mester pag’e como 2.6 miyon florin. Esey ta e suma cu gobierno a calcula, cu ta suma 5 aña di salario di Arends como e director financiero di RdA. Arends a bisa noticiacla.com caba cu e no a traha nunca den e funcion ey, pues no por claim algo cu e no tin derecho riba dje. Pero ora cu a puntr’e pa produci e carta di retiro cu e lo a entrega, el a bisa cu esaki ta pendiente y cu el a entreg’e si na RdA e tempo ey. Mientrastanto e siman aki Arends a dicidi di manda RdA su directiva un carta, pa un biaha mas reitera cu e no a traha y cu e nunca a asumi e funcion. E mesun carta aki a keda manda diaranson pa Wever, pero no ta cla, si esaki ta suficiente.