Gobierno lo anuncia maneho nobo riba hipoteca pa tereno erfpacht

ORANJESTAD – Entrante dialuna awor, gobierno lo anuncia, cu pa un hende haya permiso pa pone hipoteca riba un tereno erfpacht, e mester haya permiso di gobierno, ta loke Minister di Infrastructura, Otmar Oduber, a bisa den un conferencia di prensa. Na momento cu un tereno erfpacht, sea comercial of residencial ta hipoteca, pa un instancia cu no ta uno oficial manera un banco, e mester di permiso prome di gobierno. Algo cu aworaki no ta necesario. E maneho ey anterior ta pone cu hende por enrikese nan mes, uzando un ‘buraco den ley’ y cu ta pasa notario, sin cu por haci algo. Den un articulo adhunto riba e portal di noticiacla.com ta elabora mas riba e parti ey. E anuncio cu e cambio di maneho, lo keda publica dialuna proximo. For di e momento ey, tur hende, incluyendo e notarionan, ta alerta cu e practica actual no por mas. E mandatario a sigura, cu no ta un atake riba e notarionan necesariamente, pero ta djis alerta kico ta e cambionan cu ta bin awor. E practica cu tabata haci ta, cu un tereno erfpacht duna pa gobierno, ta hinca den un NV y ta bende e NV, cu tin un hipoteca ariba. Entre nan, e mandatario a referi na un caso recien, unda cu un persona a  cobra 2 miyon pa un pida tereno di 5 mil m2, riba Sasaki. Algo cu simplemente no por sigui mas, segun Oduber. Mes momento el a refuta cualkier acusacion cu tin eyfo, cu e mes no ta haci nada, si e no ta enrikese su mes. El a mustra cu e tin prueba y cu si tin un hende cu por prueba otro, e bin demostra esaki.