Gobierno preocupa cu e percepcion di comunidad riba e casonan di soborno

ORANJESTAD – ‘No obstante cu a mira un caida den esaki den ultimo 12 lunanan, gobierno ta keda preocupa cu e percepcion cu tin den comunidad, pa cu e casonan di soborno,’ asina Minister di Infrastructura, Otmar Oduber, a bisa diaranson mainta durante un conferencia di prensa. E ta reacciona riba e rapport, cu a keda publica pa Banco Central di Aruba riba un encuesta dirigi riba corupcion. Y esaki no a sali mucho positivo. Asina mes, e mesun encuesta ta mustra mehoracion di e 12 lunanan cu gobierno ‘nobo’ a sinta na 2017. E encuesta a tuma lugar aña pasa entre october y november. 

TERENO

E mandatario a haya ta bon pa reacciona riba e tema mirando cu un di e puntonan di corupcion mas grandi segun esunnan cu a haci encuesta, ta: asunto di permiso na Dimas, dunamento di tereno y permiso pa trabou. Pa ilustra cambio, e mandatario a mustra, cu desde cu el a sinta como Minister di Infrastructura, a haci varios cambio pa netamente combati loke cu pueblo ta percibi como ‘corupcion’. Un di nan, ta cu for di luna di mei aña pasa, a para tur otorgamento di tereno, te ora cu a bin cu un maneho diferente. Y asina a anuncia mas punto. Hecho ta cu, manera e encuesta ta mustra, esunnan encuesta a nota mehoracion den e aspecto, pa cual e mandatario ta contento. Di otro banda, a mustra cu ilustracion (prueba), unda cu e aña aki ainda, notario(nan) ta pasa acta, uzando un ‘buraco den ley’, cu ta yuda cierto persona, pa enrikese nan mes cu benta di tereno na Aruba. Algo cu entrante otro siman ta caba tambe.  

.