A ordena Mota Engil pa destrui isla riba Watty Vos Blvd y a multa nan

ORANJESTAD – Un dia despues cu DOW mes a informa cu tabatin fayo cu e isla riba Watty Vos Boulevard pa e afrit for di Dakota, e isla a lanta cu varios peon oraño pa alerta cu ‘tin un isla’ eynan. Esey sinembargo a bin mucho laat, ya cu a resulta cu Gobierno a ordena e compania di construccion Mota Engil caba pa destrui e isla peligroso riba Watty Vos Boulevard cu mester percura pa e ‘afrit’ for di Dakota, y mes momento a multa e compania. Asina minister di infrastructura Otmar Oduber a confirma diaranson. Diamars mes DOW a confirma cu tabatin fayo cometi na e parti unda cu a haci marcacionan robez. Pero mas aleu, gobierno a considera e pida isla, como uno sumamente peligroso y no a warda pa e trabou caba, pa multa e compania. “A ordena e compania pa  destrui e isla y a duna nan un multa” Oduber a sigui bisa. 

CONTRACTO

Segun contracto, no por casi haci nada na e construccion, sino te despues cu esaki caba sosode. Den e caso aki sinembargo, a considera e situacion di trafico uno hopi peligroso y a dicidi di multa e compania mesora. E no ta e prome multa cu e compania Mota Engil ta haya, ya cu den pasado recien a multa nan caba pa cierto tardansa. Mota Engil a confirma despues cu nan ta ‘bringando’ e multa aki pasobra nan no ta considera cu mester haya multa. E contracto, contrario na otronan, no ta duna gobierno of DOW e poder pa multa pa algo, te ora cu e trabou caba. Unabez cu e trabou ta completa, e ora por haci algo. E compania di construccion tin  practicamente carte blanche pa haci y deshaci, y ta ora cu cos ta cla y entrega, por pensa pa actua contra nan. E trabounan ta poco atrasa y a palabra cu awor envez di augustus, pa fin di aña tur trabou mester ta cla pa Watty Vos Boulevard.