Pensionadonan determina pa bringa propio causa den Parlamento

ORANJESTAD – E debate riba pensioen ta cuminsa dialuna den parlamento durante tratamento di e ley di pensioen. Di un banda, gobierno (lesa AVP) ta sigura cu tur cos lo termna bon pa e pensionado, mientras di parti di MEP, nan ta insisti cu lo kita di e pensionadonan. Tur esaki, mientras cu e propio protagonistanan, esta pensionado (e organisacion di pensionado publico di Aruba OPPA cu ta representa parti di e pensionadonan) a pidi su miembronan pa ta presente personalmente den parlamento pa asina nan mes bringa nan lucha. Y den mente ainda tin e promesa di gobierno haci na pensionado, cu lo paga e gelijkbedrag y bashi premie, sea como sea, for di cualkier pot cu ainda tin placa aden.

E invitacion di  OPPA a sali den fin di siman pa tur miembronan pa ta presente dilanti Parlamento di Aruba. Segun e organisacion, ‘nos derechonan ta wordo demolisa y kita door di aprobacion di parlamentarionan’. Motibo pa nan presencia ta cu ‘di aki nos por demostra nos desacuerdo y desaprobacion pa locual gobierno actual kier kita for di nos’, e comunicado ta sigui bisa. Nan ta pidi pa e ‘rosea cayente’ di e pensionado y presencia ta riba esnan cu kier aproba e leynan aki ‘cu ta demolisa nos derechonan adkeri pa añanan largo di trabao’.

Di parti di fraccion di AVP, su lider Rene Herde a sigura den fin di siman cu ‘e reforma di e fondo di pensioen di APFA cu ta wordo trata den parlamento dialuna awor, ta nifica cu e inseguridad di si por paga e pensioen di pensionadonan tur luna awor y den futuro, ta yega su fin’. Según Herde, cu e ley nobo e cobertura di e fondo ta yega 100% y e pago di pensionnan ta sigura pa tur luna. “Sin cu mester a corta den e pensioen cu pensionadonan ta cobra tur luna. E reforma aki ta nifica tambe cu e riesgo grandi pa e fondo y pa finansa publico di nos pais ta wordo elimina”.

Di parti di oposicion, parlamentario di partido MEP Xiomara Ruiz ta sigura cu cos ta diferente cu loke cu AVP ta pretende. Segun Ruiz, dialuna parlamento di Aruba lo debati riba e ley cu ta trece cambio den e pensioen di ambtenaar y den locual pensionadonan di APFA ta recibi como pago di APFA. “Den e Ley aki Gabinete Eman ta kita e voorjaarspremie, e reparatietoeslag y e najaarspremie di e pensionado di APFA” Ruiz ta sigura. Ruiz ta argumenta cu for di basta dia tin e speculacion si e pensionadonan di APFA lo cobra e suma cu nan ta haya extra na december y si gobierno di berdad lo stop cu e pago di tur e otronan sumanan cu ta cobrando banda di e pensioen. 

Tur esten, tin un promesa haci di prome minister Eman na tanto OPPA como na señora Thijsen (esun cu a protesta dilanti Bestuurskantoor) cu lo haci todo por todo pa logra wanta algo pa nan prome cu e fin di aña aki. No ta conoci si esey lo bin na orden dialuna, pero ta algo cu e pensionadonan ta contando cune tambe. Dialuna ta inicia e tratamento di un serie di ley, di cual esun di pensioen ta e prome.