Hurrex2019: Aruba ta keda bon prepara y actualisa si horcan azota nos isla

ORANJESTAD - E siman aki a tuma luga e training nacional pa preparacion pa horcan Hurrex2019. Temporada di Horcan a cuminsa na juni y ta dura te november. Miho nos prepara nos mes pa orcan, mas lihe nos por recupera despues di un orcan. Manera ta conoci, Aruba ta un isla bendiciona y ta cay pafo di area di horcan, pero esaki no ta kita cu mester prepara comunidad, pa cualkier eventualidad relaciona cu Horcan y of mal tempo. 

Siman pasa Prome Minister, Evelyn Wever-Croes, a reuni cu Bureau Rampenbestrijding Aruba (BRA) pa dialoga riba cierto punto di preparacion pa cu e temporada aki. BRA ta organisando un campaña di conscientisacion riba e tema di Horcan y e preparacionnan necesario pa e temporada aki. 

“E miho forma pa por bin bek despues di un calamidad ta, con bon bo ta prepara prome cu e calamidad. Pasobra nunca por sa con fuerte e horcan por bin. Mi ta urgi e pueblo pa sigui e campaña di conscientisacion di Buraeu Rampenbestrijding Aruba. Sigui nan conseho- y recomendacionnan facil tocante con pa prepara pa esaki”, Prome Minister a enfatisa. 

Aruba semper ta keda bon prepara y ta keda actualisa, pa si acaso un horcan azota nos isla. Hurrex 2019 ta un training grandi di horcan, pa asegura cu tur hende y e departamentonan ta bon prepara. E palabracionnan ta, cu si dado caso Aruba ta den peliger di horcan, e comision aki, encabesa pa e Comandante di Brandweer, lo ta esunnan cu lo informa y alerta pueblo di e situacion na tempo, pa asina tur hende por prepara na tempo. 

“E training nacional pa preparacion pa horcan Hurrex2019 a wordo bon atendi. Den nomber di Gobierno di Aruba, mi ta pidi comunidad pa sigui e campaña di Rampenbestrijding Aruba, cuminsa prepara y no warda te na ultimo momento”, Prome Minister Evelyn Wever-Croes a enfatisa.