Stichting voor Verstandelijk Gehandicapten Aruba (SVGA) ta celebra 55 aña di existencia

ORANJESTAD - Stichting voor Verstandelijk Gehandicapten Aruba (SVGA) ta celebra 55 aña di existencia. Na aña 1964, un grupo di persona preocupa cu e situacion di e personanan cu un limitacion intelectual, a dicidi di haci un investigacion pa wak bou cual circunstancia e personanan aki tabata biba.  Señora C. van de Berg-De Freitas, señor P. Harting y señor A. de Vries, tabata e pioneronan riba e tereno aki.

Locual nan a encontra tabata situacion deplorabel y pa cual mester bin e cambionan rapido. A lanta un fundacion dia 9 di december 1964, y a cuminsa traha e plannan. Esey a resulta den un plan di accion, parti den 4 fase. E personanan motiva, cu hopi entusiasmo, a cuminsa traha riba e realisacion di nan ideanan. Den e añanan cu a sigui a crea scol pa enseñansa special, e pasadianan, cas pa reemplasa famia y biba den bario. 

Señora Christina van de Berg-De Freitas tabata activo como presidente di nos Fundacion di 1964 te cu 2012. Pa via di problema di salud e mester a stop e trabou voluntario cu el a haci 48 aña cu tanto dedicacion. Semper nos lo keda hopi agradecido pa e trabou cu el a haci pa nos grupo meta. 

Si nos wak bek riba e 55 aña, nos ta mira cu e Fundacion a crece y a logra realisa hopi di su plannan. Ta sigui traha pa realisa mas lugar di vivienda y un scol pa e alumnonan cu ta sali di Scol Dun’ un man (voortgezet speciaal onderwijs). 

Awendia nos ta wak un Fundacion moderno, trahando cu varios specialista y e sistemanan automatisa.  

Riba tereno di cuido, guia y enseñansa e desaroyo a bay rapido. Ta uza e metodonan moderno, pa yega na integracion y participacion den nos comunidad y lo sigui traha na un desaroyo maximo di nos clientenan hunto cu e mayornan y e profesionalnan.  

E aña aki ta mehorando e calidad di bida di nos habitantenan di Cas Sjabururi door di traha un camber pa cada un. Esaki nos por logra solamente cu e sosten di comunidad henter. Si tin compania of persona cu por yuda nos cu algo pa yega na e cambernan, nan ta mas cu bon bini. Semper por tuma contacto cu e cabesante di e cas señora, Omaira Leisner na nr: 5227841 of e number general di SVGA cu ta 5227842.

Pa cuminsa nos actividadnan di celebracion tin un misa dia 30 di augustus 9 or am na e Misa Santa Filomena na Paradera.

Henter pueblo ta invita pa gradici Dios pa a duna SVGA e forsa pa haci e bon trabou cu a haci durante 55 aña caba.

Despues lo sigui cu e siguiente dianan habri pa henter comunidad bin wak ki servicio nos ta brinda:

•                24 di september 2019 na Scol Dun’ un man (Piedra Plat 86-B) di 8’or pa 10’or.

•                25 di september 2019 na Centro Man na Obra y Pasadia Briyo di Solo (Piedra Plat 97-B) di 9’or pa 11’or.

•                26 di september 2019 na Cas Sjabururi (Sjabururi 16) di 9’or pa 12’or y na Pasadia Bibito Pin (Piedra Plat 97-B) di 9’or pa 11’or.