Varios psicologo/ortopedagogo certifica pa duna terapia cognitivo pa comportamento

ORANJESTAD - Recientemente un grupo di 15 psicologo/ortopedagogo a ricibi nan certificacion di Terapia Cognitivo pa comportamento (Cognitief Gedragstherapie - CGT). CGT ta e metodo di psicoterapia, cu mas tanto ta cientificamente funda. E ta cientificamente comproba di ta un metodo efectivo pa trata varios problema. Den CGT e proceso di enseñansa ta central den realisacion, mantenemento y e cambionan den comportamento. CGT ta pues un manera di terapia, unda un persona cu e problemanan mental, ta haya ayuda pa compronde con nan comportamento ta influencia nan problemanan y con nan por cambia esaki. E ta un metodo comun den psicologia medicinal, unda por logra hopi bon resultadocu e cliente.  

E curso aki tabata organisa pa Respaldo, den colaboracion cu “PAO psychologie” di Hulanda (un instituto di enseñansa pa e psicologo- y pedagogonan den cuido di salud mental, cuido hubenil, enseñansa y cuido pa e personanan cu limitacion). “PAO psychologie” ta organisa ‘postacademische nascholing’ y educacion di e temanan psicologico y pedagogico como tambe e habilidadnan profesional, manera; supervision, liderazgo y coaching. E curso aki, presenta door di docente, Steven Strietman di “PAO psychologie”, ta un curso accredita cu tambe ta conta pa e specialisacion pa bira un “GZ-Psycholoog”. E curso a conta cu un total di 15 participante, tur psicologo of ortopedagogo di profesion. Nan ta hopi involvi den e sociedad di Aruba. P’esey cada un di nan a tuma 4 siman di nan tempo pa sigui mehora nan mes mas den pscicologia medicinal, en bes di uza e tempo aki pa por ehempel; bay cu un vakantie. 

E aumento den conocimento di psicologia medicinal ta necesario pa Aruba paso:

•            Mas di 40% di e poblacion adulto realmente mester ayudo psikiatrico 

         profesional pa problema psikiatrico.

•            Tur aña alredador di 10% di e poblacion ta afecta. Di esakinan 

         solamente alrededor di 3% realmente ta ricibi e ayudo necesario via 

         Respaldo, SPD of e psicologonan independiente. 

•            Gobierno di Aruba tambe ta reconoce e necesidad aki y a pone e 

         mehoracion den cuido di salud mental un di e puntonan di prioridad den e 

         “Sociaal Crisisplan”.  

A funda Respaldo basa riba necesidad obvio aki door di gobierno, AZV, Hospitaal y e psikiatranan: tur partido envolvi kier sigura cu mas Arubiano den necesidad, por obtene e ayudo necesario. Esaki Respaldo ta haci door di ofrece mas cuido, pero tambe door di yudando otro profesional amplia nan conocemento, pa asina nan tambe por eherce mihor. Respaldo a logra organisa e curso aki cu sosten di AZV, cu tambe ta mira cu e ayudo psikico y psikiatrico na Aruba mester mehora y amplia. Respaldo tambe kier a gradici Universidad di Aruba, pa a brinda nan localidad pa asina por a ofrece e curso aki. 

Como proximo curso pa e psicologo-/ortopedagogonan Respaldo lo kier ofrece un modulo enfocando riba diagnostico, pa asina e psicologo-/ortopedagogonan por reconoce miho e problemanan cu un persona por tin, y tambe door di ken y con lo por  yud’e miho. Tambe por menciona cu recientemente a reconoce Respaldo como instituto oficial di formacion practico pa estudio di ‘GZ-psycholoog’ e aña aki den november. Lo realisa esaki hunto cu MHC di Boneiro y Capriles di Corsou. Di Aruba, Respaldo lo organisa e cuponan pa e curso pa 3 te 4 di nan propio psicologonan y 2 cupo pa e specialistanan di SVGA. 

Tur e desaroyonan aki mester garantisa cu e atencion pa salud mental na Aruba por sigui desaroya rapidamente, paso Aruba merece cu e cuido aki ta disponibel pa tur hende cu tin necesidad di dje. Aunke nos no a logra e situacion ideal ainda, nos ta riba e caminda corecto y lo sigui crece e proximo añanan na caminda pa un berdadero “one happy island”.