E comerciantenan por netwerk durante Aruba Chamber Business Event 2019

ORANJESTAD - Camara di Comercio y Industria Aruba (KvK) a anuncia e fecha y e detayenan di e ‘Aruba Chamber Business Event’ pa e edicion di 2019. Esaki lo ta diabierna, 27 di september 2019 den e ballroom di Aruba Hilton Caribbean Resort cuminsando pa 7.30 di anochi. Ta trata di un anochi segun KvK, sumamente valioso pa cada empresario, pero tambe p’e personanan involucra cu negoshi, unda cu e oradornan lo trata varios topico di interes. E anochi lo sigui cu un momento pa netwerk den un forma ameno, cu un banda musical acompaña cu ‘open bar’.

Pa e edicion aki KvK ta sumamente orguyoso di por introduci, sr. Carl Gould for di Merca, como invitado internacional pa  bin duna un presentacion. Sr. Gould ta un empresario sumamente respeta mundialmente y a traha pa d companianan grandi, manera; Wal-Mart, Walgreens, American Idol y hopi mas. Tur esaki ta relaciona cu su habilidadnan empresarial, cu a hib’e na bira un profesional cu ta yuda d companianan crece. Durante e evento na Aruba e lo comparti varios strategia con pa ta exitoso den un mercado cu tin su retonan. 

Di Aruba tambe lo tin un orador, cu ta sr. Frans Ponson. Sr. Ponson tin un experiencia amplio den e mundo di negoshi na Aruba y lo comparti su storia di e reto-y exitonan den bida. Aki sigur e publico presente lo por haya varios ehempel, cu lo ta efectivo den nan propio organisacion