Cantidad di persona entrena pa maneha Diabetis tipo 2

ORANJESTAD - Cuminsamento di aña 2019 Fundacion Diabetes Aruba (FDA) a anuncia un proyecto nobo, cual ta PRISMA Aruba.

PRISMA ta nifica na Hulandes: ‘PRO-actieve Interdisciplinaire Self MAnagement educatie’, esta Educacion tocante Maneho Propio cu ta Pro-activo y Interdisciplinario.

Den e luna di mei FDA a organisa un curso di “train-de-trainer” pa e dunadonan di cuido, unda e profesionalnan den e diferente area di cuido di diabetes a participa. Hasta e dunadonan di cuido di Curacao a bin Aruba pa sigui e training aki. E training a wordo duna pa dos instructor for di Amsterdam UMC di Hulanda, pa asina educa e dunadonan di cuido segun e filosofia di PRISMA.

Awor Aruba tin un total di 22 PRISMA trainers, consistiendo di enfermera diabetico, dietista, fisioterapista, boticario, “praktijkondersteuner” y un dokter di cas.

Awor ta toca turno na e pashentnan!

PRISMA ta duna den forma di un curso pa stimula e maneho propio di Diabetes.

PRISMA ta pa cada persona diagnostica cu Diabetes tipo 2, cu ta motiva pa tuma responsabilidad di e malesa den su man y influencia e factornan di riesgo.

Lo duna e curso den e gruponan chikito di mas o menos 10 persona cu nan pareha of un miembro di famia. E encuentro ta guia pa 2 dunado di cuido, manera un enfermera diabetico, dietista, fisioterapista, boticario, “praktijkondersteuner” y/of un dokter di cas.

PRISMA ta ehecuta a base di e actividadnan den grupo, unda bo ta invita pa pensa y dialoga activamente.

Duracion di e encuentronan ta dos mitar dia (4 ora) durante dos siman (en total 8 ora).

Gasto envolvi pa participa na PRISMA ta solamente Afl. 50,= pa persona (incluyendo un pareha of miembro di famia). Esaki ta inclui e encuentro di dos mitar dia durante dos siman, buki di informacion y un plan di accion.

Pa mas informacion tocante e cursonan y pa registra por bishita www.fdaruba.com of tuma contacto via info@fdaruba.com of 566-5045