Van Zwol y gobierno di Aruba no a haya otro!

ORANJESTAD – Gobierno di Hulanda y Aruba no por haya otro riba varios punto financiero e fin di siman aki. Y esnan serca di e reunion a mustra cu e bishita entre e representante di gobierno hulandes, Richard van Zwol, y gobierno di Aruba e fin di siman aki a parse di a fracasa. NoticiaCla.com tin informacion cu e motibo di e ‘fracaso’, ta entre otro e hecho cu e representante lo no a logra convence gobierno di Aruba pa tuma mas di e recomendacionnan di secretariado di College Financieel Toezicht (CFT) y incorpora esaki den su maneho presupuestario. Gobierno di Aruba lo a para ariba cu e la tuma tur e recomendacionnan posibel. Y asina partidonan a bay for di otro, sin por a haya otro diabierna. Y pa completa e obra, e hecho cu van Zwol a cancela su reunion di diasabra cu tur lider di fraccion, tabata otro señal di cu cos no a bay bon.

E sorpresa tabata mas bien pa e lidernan di fraccion cu a bin tende di e cancelacion apenas diasabra mainta. Tur tres lider di fraccion (AVP, MEP y Democracia Real)  a confirma esaki na NoticiaCla.com. “Enberdad mi a wordo notifica di e cancelacion awe mainta” lider di MEP, Evelyn Wever a confirma na Noticiacla.com diasabra atardi. Andin Bikker di Democracia Real a confirma bisando practicamente mescos “Awe mainta nan a yama bisa”, Bikker a bisa NoticiaCla.co. "Cu mi tambe nan a cancel" Herde di AVP a bisa NoticiaCla.comAmbos a bisa cu e motibo no tabata conoci. NoticiaCla.com sinembargo a compronde cu van Zwol, despues di e reunionnan di diabierna, no a sinti cu ta necesario pa reuni mas lew. E ambtenaar mas poderoso di Hulanda tabata poni pa bandona Aruba diasabra anochi mes. Fuentenan di NoticiaCla.com a indica cu e resultado di e fin di siman aki no ta pinta mucho bon pa Aruba, ya cu e actitud di e fin di siman aki, Aruba a basicamente ‘seya’ su destino financiero pa e proximo lunanan. Y den mesun rosea a splica cu no mester keda sorprendi cu loke Aruba a scapa di dje recientemente, esta di haya un di dos KB, awor ta practicamente un hecho ora cu conseho di minister di Reino hulandes reuni prome siman di december atrobe. NoticiaCla.com a tuma contacto cu minister di finanza Angel Bermudez, pero e no a reacciona riba e peticion pa informacion. Presidente di parlamento Marisol Lopez a confirma cu e la reuni cu van Zwol pero no por a divulga e resultado di e reunion ey.