Kiwanis Club of Palm Beach ta promove uzo di ‘childseat’ den trafico

ORANJESTAD – Riba diasabra ultimo, 24 di augustus 2019, Kiwanis Club of Palm Beach e tene un evento exitoso, pa promove e uzo di ‘childseat’ den trafico na Aruba. Un ‘childseat’ ta un asiento di auto pa baby of mucha chikito, cu ta protega e mucha den caso di accident den trafico.

A tene e actividad diasabra atardi caminda cu pa 3.30pm a cuminsa reparti sticker di conscientisacion di uzo di ‘childseat’ riba L.G. Smith Boulevard na altura di oficina di Aruba Tourism Authority (ATA). Pa 5.00pm tabata tin un actividad na Neptali Henriquez Park, caminda Kiwanis Palm Beach a haci entrega di 25 ‘childseats’ na e famianan di menos recurso den nos comunidad.

Na e ocasion aki sr. Michel Janssen, President di Kiwanis Club of Palm Beach, a expresa: “Ta importante pa tin conscientisacion pa uzo di ‘childseat’ den trafico, cu ta na bienestar y seguridad di tur mucha, cu ta nos futuro generacion. Ademas di conscientisacion general, pa hopi aña nos ta haci donacion di ‘childseat’ na e famianan di menos recurso. Ta cubri e gastonan di e proyecto aki cu e fondonan cu nos club di servicio ta recauda durante e aña. Asina nos ta contribui na seguridad den trafico pa nos muchanan”.

Presente tabata tambe vocero suplente di Cuerpo Policial, sra. Liliana Rasmijn, kende a enfatisa e aspecto di seguridad den trafico y e leynan vigente riba e tereno aki:

“Conforme nos ley, mucha di edad bou di 12 aña mester sinta patras den auto den un forma sigur. Esaki ta cu un faha di seguridad pa e muchanan mas grandi y esunnan chikito mester ta den un stoel apropia y bon instala, e asina yama ‘childseat’.

Duranto control policial hopi biaha nos ta topa cu e fenomeno cu tin mucha para memey den e auto, dus los entre e asientonan, of mucha sinta dilanti den scochi. E consecuencia di esaki ta, cu si dal un brake repentino of den situacion di un accident, e mucha lo por lesiona su mes contra e windshield. Esaki ta algo sumamente peligroso y ta mira esaki hopi durante e accidentnan. E mensahe di Cuerpo Policial ta pa semper bo yiu ta sinta den un ‘childseat’, pa preveni algo lamentabel sosode. Ta mihor preveni cu lamenta! Nos ta gradici y apoya e proyecto di Kiwanis Club of Palm Beach pa loke ta e entrega y conscientisacion pa e uzo di childseat.”

Finalmente Sra. Monique Giel, representante di Wit Gele Kruis, a expresa: “Nos ta orguyoso di ta un partner den e proyeco aki pa hopi aña. Nos aporte ta encera cu nos ta escoge e famianan, cu ta bin na remarca pa haya un ‘childseat’ na e ocasion aki door cu nos sa, cu nan por haci bon uzo di dje. Nos ta felicita Kiwanis Club of Palm Beach cu un otro edicion exitoso di e proyecto aki y nos ta contento cu nos por a forma parti un biaha mas di e proyecto importante aki“.

Kiwanis Club of Palm Beach Aruba ta forma parti di Kiwanis International, un organisacion mundial di voluntario dedica na cambia mundo, cuminsando na un comunidad y un mucha. Nos ta un organisacion den crecimento, dedica na yuda e muchanan di mundo henter, hisando nan calidad di bida.

Pa mas informacion di Kiwanis Club of Palm Beach bishita nos webpage na www.kiwanispalmbeach.com of nos Facebook Page na https://www.facebook.com/kiwanispalmbeach.