FTA: STA ta legalmente y obhetivamente incorecto riba asunto di referendum AAA

ORANJESTAD – Sindicato STA ta legalmente y obhetivamente incorecto riba asunto di referendum AAA, manera cu STA a pone den nan carta y comunicado ultimo. FTA den un reaccion dialuna a refuta e ponencia di S.T.A., cu si acaso e resultado di e proximo referendum na A.A.A. ta cu F.T.A. no haya mayoria di voto, S.T.A. lo keda automaticamente como e sindicato representando e empleadonan. E ponencia aki, manera indica den e carta, ta legalmente y obhetivamente incorecto.  Pa medio di e comunicado, Federacion di Trahadornan di Aruba (F.T.A.)   a reacciona riba e comunicado di prensa, emiti door di Sindicato di Trahadornan di Aruba (S.T.A.) mediante di su presidente, Sr. Diego de Cuba, den cual e ta referi na un carta informativo, cu tabata adresa na empleadonan di Aruba Airport Authority N.V. (A.A.A.).

Den e comunicado aki F.T.A., uzando e argumentonan debidamente substancial, a refuta e ponencia di S.T.A. cu si acaso e resultado di e proximo referendum na A.A.A. ta cu F.T.A. no haya mayoria di voto, S.T.A. lo keda automaticamente como e sindicato representando e empleadonan. E ponencia aki, manera indica den e carta, ta legalmente y obhetivamente incorecto. Si acaso F.T.A. no haya mayoria di voto, A.A.A. lo por nenga di reconoce S.T.A., como cu e no a participa na e referendum y por lo tanto no por substancia su ponencia, cu e empleadonan di A.A.A. a apunta e pa representa nan den negociacion di un C.A.O. nobo. Manera cu e situacion ta, de facto si F.T.A. no logra mayoria di voto den e referendum di 27 di augustus, A.A.A. lo keda sin sindicato.

F.T.A. ta lamenta cu den su reaccion Sr. de Cuba un biaha mas ta “conseha” e empleadonan pa keda sin bay vota, locual ta un acto sumamente iresponsabel, cu por tin consecuencia hopi serio. Sr. de Cuba, banda di cualifica un decision di Corte di Apelacion como “coy loco di Korsou”, un bes mas no ta argumenta su ponencia cu door di no participa na e referendum, di un of otro forma S.T.A. lo mantene su mes como e sindicato legalmente apunta pa negocia un proximo C.A.O. Ademas nos no por keda sin condena e hecho cu Sr. de Cuba den su comunicado ta scoge pa “bully” su propio coleganan di A.A.A.

Nos ta spera algo diferente den un sindicalismo moderno, responsabel y di nivel. No por perde di bista cu como sindicato bo ta carga un responsabilidad enorme, cual ta salvaguardia e interesnan laboral di bo miembronan. Na momento di busca apoyo cerca e clase trahador, mester haci esaki di un forma responsabel y cu argumento valido y cu bon esencia. No por medio di e frasenan populista y e insinuacionnan sin base. Nos mundo laboral di awendia ta consisti di muher y homber inteligente y critico, kende merece di ta trata y informa di un forma adecua, pa asina por tuma e decisionnan corecto.

Sindicato F.T.A. den e caso aki ta pone e hechonan concreto riba mesa, cual por yuda abo como trahador tuma un decision consciente na momento di haci bo escogencia. E hechonan di F.T.A. ta papia pa nan mes. Y e sindicato ta sigui relata riba e hechonan segun nan. 

• Hecho ta cu F.T.A.tin 55 aña di experiencia defendiendo e interesnan laboral di su miembronan den tur sector di e economia di Aruba.

• Hecho ta cu F.T.A. ta negosha y cera e contratonan colectivo di trabou (c.a.o.) cu mas cu 50 empresa na nos isla.

 Hecho ta cu F.T.A. su maneho y finanzas ta controla y aproba anualmente den e congresonan, cual ta atendi pa mas di 90 delegado den representacion di mas di 3000 miembro afilia.

• Hecho ta cu F.T.A. su organisacion, banda di tin un Departamento Administrativo, ta conta cu un Departamento di Negociacion (DENEG) dedica specificamente na negocia e contratonan colectivo. Ademas F.T.A. tin su Centro di Formacion (CENFOR) cu ta prepara sindicalmente tanto su delegadonan como su miembronan en general. F.T.A. ta conta tambe cu su Departamento di Keho, Disputa y Conflicto (KDC), cu tin como tarea intermedia cu gerencia di e empresanan afilia, na momento cu e miembronan tin problema na pia di trabou. Si acaso no por resolve esakinan na mesa, F.T.A. tin su Departamento di Asuntonan Legal (DAHU), cual por medio di su abogadonan ta encarga di procede legamente na defensa di su miembronan. Tur e servicionan aki ta inclui den bo miembrecia mensual, sin necesidad di haci pago adicional.

“ Laga e hechonan concreto y verificabel aki ta bo guia na momento di haci bo esogencia pa e sindicato, cu abo ta desea pa sali na defensa di bo interesnan como trahador” e comunicado ta finalisa bisando.