Tjon: Hulanda no tin autoridad pa obstaculisa cambio den ley di LAFT

ORANJESTAD – Hulanda no tin ningun autoridad pa obstaculisa e Ley di LAFt den e formato nobo. Esey ta pensamento cu di lider di fraccion di MEP den Parlamento di Aruba, Rocco Tjon, a duna di conoce dialuna mainta, anticipando un posibel debate diabierna awor na Hulanda, ora cu Rijksministerraad trata e asunto. “Constitucionalmente y segun nos Statuut, nan no tin ningun autoridad pa obstaculisa e ley aki. Practicamente diabierna awo locual Gobierno di Reino lo trata ta, si nan kier bay actua contra tur principio di bon gobernacion y de facto comete un acto contra un pais autonomo,” Tjon ta bisa den un comunicado dialuna. Hulanda a laga sa caba, cu nan no ta acepta e cambionan haci pa Parlamento y cu Aruba tin cu adapta esaki.

REUNION NA CORSOU

Segun Tjon, diabierna ultimo nan a reuni cu representante Hulandes na Corsou riba e topico di supervision financiero y a dun’e un splicacion amplio riba e aspectonan di maneho, huridico y constitucional. A splica cu Parlamento ta habri pa un solucion mutuo, pero no lo acepta ningun atentado contra nos estado di derecho.

SUPERVISION FINANCIERO SPLICA NA ANALOGIA DI POLIS

Tjon despues a splica e situacion den forma di un analogia di polis. No ta conoci si el a haci esaki, debi cu e tabata polis prome cu a bira parlamentario. “Prome cu un agente policial aresta un persona, e ta zorg pa e tin permiso di Ministerio Publico y e ta planifica e detencion. A pesar cu e ta actua segun nos leynan y ta bay detene un persona cu a comete un infraccion contra ley, e mester ta determina y tin curashi pa ehecuta e detencion. Esaki door cu e sospechoso no lo dun’e su rason sin mas y para pa e wordo deteni. E sospechoso lo analisa e situacion y haci un escogencia, sea e ta respeta autoridad, core bay of bringa autoridad. P’esey ta asina importante pa e agente policial mustra confiansa y determinacion, paso depende di e decision di e sospechoso, e lo actua pa asina garantisa orden pa su comunidad” Tjon a bisa. “E situacion di supervision financiero ta practicamente igual. Pais Aruba ta actuando segun e principionan di bon gobernacion y segun locual nos constitucion ta prescribi. Tur rapport, conseho huridico y cifra ta mustra cu nos como pais, ta actua corecto. Sinembargo diabierna awo Hulanda lo dicidi si nan ta respeta nos estado di derecho of si nan ta bay actua contra e principionan di bon gobernacion” Tjon a sigui bisa.

PA CONCLUI

Segun Tjon, a duna tur politico Hulandes di conoce cu nan (Aruba) ta habri pa un solucion mutuo. “E bala ta den skina Hulandes aworaki. Nan lo dicidi si nan lo respeta nos estado di derecho of actua linea recta contra un democracia. Un cos ta sigur, mescos cu e agente policial cu ta bay detene un sospechoso, nos ta determina pa no obstante e decision di Hulanda, nos actua contra un decision incorecto di Hulanda diabierna awor. No ta tur ora bo lo haya bo rason, tin ora bo mester exigi bo rason, “  Tjon a finalisa bisando.