Aeropuerto di Aruba y Forza Marino Hulandes cu ehercicio conhunto

ORANJESTAD - Aruba Airport Authority N.V. (AAA) y Marineronan Hulandes staciona na Aruba a haci un ehercicio conhunto intensivo pa practica comunicashon, vigilancia, respondemento y cooperashon multidisciplinario. E ehercicionan aki cu a wordo haci for di Diahuebs atardi pa Diabierna mainta ta di suma importancia pa ambos organisacion. E Marineronan Hulandes a haci e ehercicionan aki durante y despues di operacionnan na aeropuerto y mester a responde na e retonan di train na un aeropuerto internacional.

Un total di 5 scenario a wordo practica. Tur scenario a wordo completa exitosamente. E cooperashon y coordinashon entre AAA su personal di seguridad y airside tabata hopi bon. AAA y Marineronan Hulandes a mustra tambe hopi bon coordinashon y teamwork, mirando e hecho cu AAA su personal intencionalmente no a wordo informa di niun di e scenarionan y mester a responde ad hoc y den algun caso di forma simultaneo.

“Nos ta mira beneficionan grandi door di ta parti di e tipo di trainingnan aki, pasobra nos personal tambe lo keda altante di e ultimo posibel scenarionan di menaza y medidanan di mitigacion. E resultadonan lo wordo evalua hunto y si ta necesario, procedura y polisanan lo por wordo revisa a base di e resultado. Nos por mira atras riba un ehercicio hopi positivo y pesei nos kier gradici tur esnan cu a yuda pa e tabata exitoso,” asina Business Unit Manager di Seguridad di AAA Sra. Angeline Flemming a bisa.