Merca ta gana Corsou den final di Serie Mundial di Little League Baseball

Posted on 08/25/2019 8:24 pm AST | Updated on 08/25/2019 8:26 pm AST

WILLIAMSPORT – Despues di 10 dia, e Serie Mundial di Little League a termina, cu Merca (e ekipo di River Ridge Louisiana) ganando e titulo maximo diadomingo atardi cu score di 8-0, lagando e ekipo di Corsou na di 2 lugar. Un dia prome Corsou a sa di gana e titulo di International Little League Champions, ganando di Japon 5-4. Pero manera e structura real ta, Corsou mester a gana diadomingo di e representante di Merca, pa por a yama su mes campeon mundial. Pa Louisiana, esaki tabata nan prome titulo di Campeon Mundial di Little League, cu nan pitcher Egan Prather, cu no a permiti careda di Corsou. E ekipo di Merca a sali afor den di 5 inning cu 4 careda riba 4 hit. Corsou su unico momento real tabata den di 3 inning, ora cu nan a logra yena tur base, pero no a logra score careda. Prather a tira un wega completo. Pa loke ta Corsou, nan a demonstra cu nan tin talento y no a entrega durante henter e torneo. Mescos cu Louisiana, cu a perde na prome partido contra Hawaii, Corsou tambe a perde un partido (contra Sur Korea), pero a bounce bek y gana tur nan weganan siguiente y gana e titulo internacional diasabra. E unico otro wega cu nan a perde, tabata e final grandi. Di parti di gobierno di Corsou, Prome Minister a manda mensahe di sosten y pabien pa e ekipo y tambe e rednan social a keda inunda cu mensahe di felicitacion y sosten. Bunita tabata e sosten pa Corsou for di e otro islanan di Caribe Hulandes, cu a sigui Corsou manera ta nan mes tabata hungando. Pabien Corsou pa un bon trabou!

 

  • Powered by SETAR