Edificio nobo di utilidad na aeropuerto a yega su punto mas halto

ORANJESTAD – E edificio nobo di utilidad na aeropuerto a yega su punto mas halto y a celebra esaki cu e acostumbrado spantenbier diabierna ultimo. E minister encarga cu aeropuerto Dangui Oduber tabata presente pa e evento, y hunto cu e director saliente di aeropuerto James Fazio, a atende esaki cu invitadonan. E edificio ta parti di e proyecto miyonario di expansion di e aeropuerto, esta Gateway 2030. E ta un inversion di 500 miyon florin cu mester keda completa dentro di 5 aña. 

EDIFICIO DEN USO

Actualmente e edificio di Utilidad cu ta den uzo ta esun na e terminal di e aeropuerto, pero esaki ya caba ta “out dated”. Ora e edificio di Utilidad nobo ta den funcion, e bieu lo wordo kita pa asina por sigi cu e parti di expansion di e terminal. E edificio nobo lo tin su mesun “solar panel” y lo percura pa e coriente (general y di emergencia), tambe e lo percura pa e awa (sprinkler, portabel y frieu). Acerca tambe lo bin un cas di guardia nobo cu lo remplasa e entrada principal existente di vehiculo pa bay na e “airside”. Tur esakinan ta elementonan sumamente importante pa e realisacion di Gateway 2030 den su totalidad. 

FASE DI CONSTRUCCION

E fase di contruccion ta casi cla despues cu dialuna pasa e yega na e parti mas halto cu ta e prome “cooling towers”. E actividad di construccion principal lo keda complete prome cu e aña 2020. E edificio di Utilidad nobo ta planea pa ta operacional den e prome dos lunanan di aña 2020, esaki despues di haci tur e test necesario, e start op y transicion di e utilidad bieu pa e nobo.

E ta di sumamente importancia pa e edificio di utilidad nobo keda cla y ta operacional. Teniendo na cuenta e importancia di e aeropuerto, pa Aruba y su turismo en general. A diseña y construi e edificio cu standartnan hopi halto pa absorba mal tempo manera horcan y tambe temblor. Banda di esaki e edificio ta hopi eficiente na energia, hopi confiabel y redundancia.