Aruba Airlines a inaugura su buelo pa Riohacha diabierna

ORANJESTAD – Despues cu a haci estudionan necesario, Aruba Airlines a ‘inaugura’ su buelo pa Riohacha Colombia diabierna mainta, cu un grupo di prensa y algun pasahero. Segun operations manager Frank Arends, esaki ta bira un di e tres destinacionan cu Aruba Airlines kier bula pa Colombia. Fuera di Riohacha, tin pensa tambe pa bula Medellin y Baranquilla. A cuminsa cu Riohacha pasobra e ekipo (avion) ta cla y por a cuminsa mesora. E ta un ruta popular, conoci pa otro aeroliñanan manera Tiara Air cu a bula e ruta aki exitosamente pa 5 aña largo. E ta un destinacion cu ta conecta famia cu otro, comercialmente tambe y ta uno basta barata. Ta usando e avion tipo CRJ 200, cu 50 pasahero, y tin pensa di usa e mesun tipo di avion aki pa e otro destinacionan den Colombia. 

E BIAHE

E biahe di diabierna tabata uno special unda cu prensa a haya un desayuno chikito na porta di salida na Aruba, un entrevista cu e operations manager y despues e buelo mes di 50 minuut. Na yegada na Riohacha, e delegacion a wordo ricibi pa e personal di Aruba Airlines na Colombia y tambe cu musica tipico di e pais, hunto cu delegacion di turismo y comercio. Despues di rato ameno, e delegacion di Aruba a bolbe Aruba diabierna atardi mes. E intencion ta pa tin buelonan tres biaha pa siman, diabierna, diadomingo y diaranson saliendo for di Aruba 10 or di mainta ora lokaal y ta jegando Riohacha 09:45 AM ora di Colombia. Riohacha ta un punto di conección atractivo cu ta brinda e posibilidad nan pa conecta cu otro ciudad nan den Colombia mes.