SADA: Gobierno a confirma cu tin placa aloca pa douaneronan

ORANJESTAD – Gobierno a confirma na sindicato di douanero (SADA) diabierna mainta, cu tin fondo aloca pa paga e asunto di structura di salario. Asina presidente di e sindicato, Eduard Maduro, a bisa Noticiacla.com diabierna atardi. Diabierna mainta e sindicato a reuni cu e trahadonan durante ora di trabou, como un tipo di accion. Esaki a haya atencion di e minister cu a reuni cu nan mesora y awor parce cu nan a sali for di e reunion den un forma positivo. 

E REUNION

Awe mainta e diabierna a cuminsa cu e reunion pa 8’or pafo di Budlex Building, sigui pa un reunion na Bestuurskantoor. Aki gobierno a dicidi pa suspende e ministerraad andando, pa asina e ministernan Maduro (Finanza) y Bikker (Husticia) por a reuni cu e sindicato. “E reunion a bay hopi bon, pero door cu e director di DRH (Recurso Humano) no ta na Aruba, nan a prik un datum(2 sept) pa sinta den un setting cu Minister President, Minister Finanzas, Minister di Husticia, DRHl, DWJZ, mediador di gobierno y SADA mes” Maduro a bisa. “ Pa e dia ey mester bisa nos ki dia lo paga porfin”. Pero e bon ta, segun Maduro, cu minister lo a bisa cu placa no ta un ‘issue’. “E placa ta aloca pa paga” Maduro a finalisa bisando.