E trabounan pa studia e subsuelo na Sero Colorado a inicia

Posted on 08/23/2019 5:15 pm AST | Updated on 08/23/2019 5:15 pm AST

ORANJESTAD -  E trabounan pa loke ta e ‘grondonderzoek’ pa e proyecto di hotel na Sero Colorado ta tumando luga. Asina Minister di Medio Ambiente y Infrastructura, Otmar Oduber, a informa diabierna. Segun e mandatario, e investigacionnan aki ta e rekisito- y condicionnan cu Gobierno a pone caminda a bisa cu mester tene cuenta cu e tunnelnan di awa (mirando cu no tin ningun otro cueba natural na e sitio y tampoco mina di fosfaat). Ta trata di e tunnelnan di awa, cu a traha den e periodo di Lago. Mester enfatisa cu lo conserva e tunnelnan y nan lo keda publico tambe. 

DOW lo percura den e prome fase aki, pa e especienan protegi cu tin na e sitio, ta mas tanto recogi, pa por planta nan bek den otro proyecto di Gobierno. E compania a haya un ‘aanlegvergunning’, cu ta pone cu na momento cu nan bay rosa e tereno pa haci esaki ‘bouwklaar’, nan lo mester pidi un ‘ontheffing’ for di Directie Natuur en Milieu (DNM) pa entre otro; e bushinan cu tin riba e tereno aki, cu ta den e lista di especienan protegi. Ta calcula cu e trabounan aki di preparacion pa construccion lo inicia den luna di september. Pa cual ta calcula cu construccion di e hotel mes, lo cuminsa october/november di e aña aki. 

Tur departamento di Gobierno envolvi manera, DIP, DOW, Kadaster y DNM ta den comunicacion continuo y hunto cu e desaroyadornan, lo mester percura pa cumpli cu e maneho cu tin y tambe e leynan cu tin, pa loke ta proteccion di nos medio ambiente y e leynan di proteccion di cierto especie. 

Finalmente pa enfatisa, ta garantisa na comunidad, cu ta tuma den consideracion e tunnelnan y balor natural na e sitio y den e proceso ta percura, pa anda cu esakinan na e miho forma. Pa esaki e departamentonan menciona y Ministerio encarga cu infrastructura, naturalesa y medio ambiente, ta den contacto estrecho. Pa e motibo ta lamenta cu tin informacion eroneo ta circula riba media, riba e tema aki y e trabounan andando.

  • wc2 enero
  • Powered by SETAR