Rotary Club Aruba a ricibi bishita di District Governor Trevor Blake

ORANJESTAD - Dialuna mainta a cuminsa e bishita oficial di District Governor Trevor Blake na Aruba. Trevor ta di e isla St. Kitts and Nevis y ta e Governor di e Districto 7030 di Rotary International pa e aña aki. Aruba y e ‘hermana’ islanan Corsou y Boneiro ta forma parti di e Districto aki desde 1 di januari 2017. Tur aña e District Governor ta bishita tur e islanan den su districto, unda tin un Rotary Club pa asina conoce e miembronan di e club, e comunidad y e proyectonan cu ta ehecuta door di e Rotary Club local. E District Governor tabata compaña pa e Assistant District Governor Rita Merkies di Rotary Club Willemstad. Rita ta fungi como e “link” entre e islanan ABC y e districto 7030 di Rotary International. 

E bishita oficial a cuminsa na Stichting Casa Cuna Progreso. Rotary Club Aruba e aña aki a cuminsa duna sosten na e proyecto di “tienermoeders” di Casa Cuna. E proyecto aki ta encera e construccion di un facilidad special pa e mamanan hoben y nan baby. Rotary Club Aruba lo ta activamente envolvi den esaki pa e añanan cu ta bin.

Despues a sigui pa Piedra Plat na un a bishita Club Kibrahacha 60+. Na aña 1985 bou di guia di miembro honorario, sr. Eric D'Arnault, Rotary Club Aruba a funda esaki. Awendia, 34 aña despues, Club Kibrahacha 60+ a crece den un centro cu e miembronan activo y cu ta organisa hopi actividad pa nos grandinan. E District Governor a haya un presentacion y un rondleiding di sr. Jeffrey Matos di e facilidadnan. E bishita na Club Kibrahacha 60+ a conta cu presencia tambe di nos Minister President, sra. Evelyne Wever-Croes. 

E bishita a sigui na Y.M.C.A Dakota. Otro organisacion funda pa Rotary Club Aruba y pa hopi aña ta ricibi donacion y sosten di entre otro Rotary Club Aruba. E Secretario General di Y.M.C.A., Sr. Rhomyko Winklaar, a elabora riba e organisacion y e actividadnan di Y.M.C.A. Despues a sigui un rondleiding di e lugar.  

Anochi, durante e reunion semanal di Rotary Club Aruba, e District Governor a haya oportunidad pa topa cu e otro miembronan di Rotary. E miembronan di Rotaract y Interact tambe tabata presente na e reunion special aki. 

District Governor a hiba palabra, unda el a indica di a keda masha impresiona cu e proyecto- y actividadnan di Rotary Club Aruba, Rotaract Club Aruba y Interact Club Aruba. El a gradici tur miembro pa nan aporte na e comunidad di Aruba y na Rotary su idealnan