KVK: Reunion cu Minister di Finanza riba reforma fiscal tabata fructifero

ORANJESTAD – E reunion cu Minister di Finanza, Xiomara Maduro, diahuebs ultimo (22 di augustus 2019) riba reforma fiscal tabata fructifero. Asina e gremio comercial a bisa den un comunicado diabierna. Segun e gremio, e reunion tabata uno positivo, caminda tanto KvK como e Minister a discuti abiertamente riba e punto di impuesto, en particular e importancia pa laga BBO riba recibo y e consecuencianan cu esaki ta bin cu ne.

KvK a informa Minister riba tur e beneficionan cu ta presenta, si laga e BBO riba e recibo. Gobierno y e consumidor ta beneficia di e transparencia aki. E consumidor por verifica kico ta e prijs real y kico ta su pago na BBO/BAZV/BAVP. Pa comercio e administracion ta hopi simpel y barata, uzando e paketenan di computer di mercado of un bon manual di papel, cu por compra den boekhandel, pa cumpli cu calculacion y pago. KvK a expresa su preferencia pa tin un tarifa unico di 6.0% di benta di Producto y Servicio solamente (sin inclui e suma di impuesto) riba e bon, cu mester ta completamente identico, cu e pago cu tin cu haci pa Gobierno, uzando e modelo, por ehempel di Merca. Minister a tuma nota di tur e informacion cu KvK a trece dilanti den forma abierto y a informa cu e lo sinta cu tur stakeholder, pa tende tur sugerencia cu nan lo por tin. Pa loke ta e cambio di BBO pa otro sorto di impuesto indirecto, KvK a conseha Minister pa considera e forma di cobra BBO manera sugeri, ya cu esaki ta ofrece varios beneficio, p.e. e ta sumamente rapido pa implementa. KvK tambe a entrega Minister un sinopsis y comparacion di e diferente impuestonan indirecto den uzo awendia y di cada uno su beneficio of desbentaha y con KvK a yega nan e decision pa sugeri e modelo di ‘sales tax’ pa cobra nos BBO/BAZV/BAVP. KvK a pone su organizacion disponibel, pa sinta cu e comision cu ta trahando riba e reforma fiscal pa splica tur locual KvK a presenta.

E reunion a duna indicacion di un bon relacion y cu tin un caminda pa cana, pa yega na un bon reforma fiscal. KvK ta positivo y a indica na Minister, cu KvK kier contribui pa hunto cu Gobierno traha na bienestar di Aruba.