KvK a alerta minister di competencia inhusto di cierto distribuidor y comerciante

ORANJESTAD – Durante e reunion cu Camara di Comercio tabatin cu minister di Finanza Xiomara Maduro e siman aki, a probecha pa alerta e Minister riba e situacion di competencia inhusto di cierto distribuidor y comerciante den tienda ta confronta cu ne diariamente. Tin comerciante preocupa, cu tin negoshi ilegal, cu diariamente ta importa e productonan y ta capaz di pone prijs mas abou, pasobra nan no ta cumpli cu e rekisitonan, pa haci negoshi manera; registra e negoshi y paga impuesto. KvK ta sostene e empresarionan y hopi di nan ta kere den competencia, pasobra esaki ta hisa e calidad di e producto y servicio y di nan benta ta cumpli cu impuesto y e beneficionan social di empleado. Pero e comerciantenan ta haya cu esaki mester keda den un forma husto, caminda ta reina un ‘level playing field’. Un comerciante, cu ta cumpli cu ley, no por competi contra e negoshinan ilegal, cu no ta cumpli cu leynan di impuesto. Esaki ta resulta cu e gastonan pa mantene un negoshi ta mucho halto, anto KvK tin diferente opcion con pa combati esaki.

KvK su intencion ta, pa hunto cu Gobierno yega na e solucionnan practico y factibel. Comercio mester por sigui crece door di elimina e obstaculonan, cu nan ta confronta cu ne, manera; red tape cu ta obstaculisa e negoshi pa establece door di trece mas gasto y perdemento di tempo. Si nos kier stimula comercio y e inversionistanan, e ora Gobierno tin cu percura cu e leynan ta facilita y duna espacio na e negoshinan, pa establece y haya forma pa haci ganashi, mientras ta cumpli cu ley y paga impuesto di e negoshi.