Lider di MEP Evelyn Wever: Luigi Bergen lo bira parlamentario pa MEP

ORANJESTAD – E candidato Luigi Bergen lo bira e reemplasante di parlamentario Sue-Ann Ras pa fraccion di MEP den Parlamento. Asina Evelyn Croes a contesta Noticiacla.com diahuebs mainta riba e pregunta si a keda cla caba finalmente ken ta reemplasa parlamentario Sue-Ann Ras. Despues cu parlamentario Sue-Ann Ras a informa e siman aki definitivamente, cu e no ta bolbe como parlamentario, a cuminsa e proceso definitivo di reemplas’e. “Sr Luigi Bergen ta esun cu tur probabilidad lo asumi e funcion” Wever a bisa e portal aki . E hecho cu Ras a acepta pa keda te dia 10 di september, ta duna e partido e espacio necesario pa regla esaki mas liher. 

E CASO DI RAS

Ras, manera ta conoci, a anuncia su retiro despues di su biahe di trabou na Hulanda na juli, a consecuencia di e situacion crea, ora cu un periodista Hulandes a gar’e ta wak Netflix durante e ultimo reunion na Hulanda. Ras na su regreso a anuncia su retiro publicamente y pidi disculpa pa su actuacion. Aunke e no a comete nada ilegal, el a haya ta mas corecto pa e retira y duna un ehempel, con mester actua den situacion y funcion asina. 

REACCION

Na prome instante Wever a bisa, cu Ras a haci lo corecto cu su retiro. Sinembargo e siman aki, Wever a bisa cu ‘un simple despensa por tabata suficiente, specialmente si bo compar’e cu e situacion cu nos ta aden aworaki cu Richard Arends’. “Sinembargo ta di respeta y mi ta admira Sue-Ann su decision. Bo ta wak cu e ta tuma un decision pa su mes, di su mes, basa riba norma y balor cu el a wordo lanta cu ne di su mayornan, di su famia”. 

RECONSIDERA 

Partido MEP sinembargo a pidie pa e reconsidera y tuma su tempo. Ras a haci esey y finalmente toch a informa partido, cu e ta para tras di su decision di retira. Riba insistencia di partido, Ras aunke e tabatin problema cu esey naturalmente, a dicidi di coopera cu partido y keda te dia 10 di september. “Aña parlamentario ta habri dia 10 di september y pa e ora ey, nos mester por a keda cla cu e reemplaso di Sue-Ann Ras” Wever a finalisa bisando.