Presupuesto 2020 no ta keda cla pa entrega dia 1 di september awor

ORANJESTAD – Presupuesto 2020 lo no keda cla pa entrega dia 1 di september 2019 manera ley di comptabilidad ta prescribi. Prome Minister, Evelyn Wever, a confirma esaki diahuebs pa noticiacla.com. Di otro banda, Wever a bisa si, cu lo entrega algo pa e fecha ey, un idea di con e presupuesto lo ta. “Nos ta na e ultimo fase di prepara e begroting 2020. Nos no a cera e begroting ainda” Wever a bisa. Loke e kiermen cu esey, ta, pues yega na e surplus di 25 miyon cu tin cu yega otro aña conforme e normanan stipula cu CAFT. “Mi no ta kere nos ta cla 1 di september, pero dia 1 di september nos lo tin algo si pa entrega y mustra ki direccion nos ta bayendo”. 

FINALISANDO

“Nos ta finalisando e. E ta un tema di deliberacion tur dia, pa e ora nos por entrega e presupuesto mas liher posibel” Wever a sigui bisa. Manera indica, pa ley, mester entrega presupuesto pa dia 1 di september pa e proceso cuminsa cana y pa e por keda aproba prome cu aña siguiente bolter. Desde introduccion di CAFT, e ley di LAFT tabata stipula e fecha di 15 di december mas tarda, cu CAFT mester haya un tipo di informacion di e presupuesto, pa e tin un indicacion kico ta kico. Si pa e fecha ey, no ricibi nada, e ora e ta duna CAFT autorisacion, pa avisa Hulanda pa duna Aruba un instruccion, osea ‘aanwijzing’. Pero si duna sikiera algo di indicacion, ta suficiente pa CAFT keda ‘trankil’ y no actua contra pais Aruba.