Plataforma ley di cacho a topa cu pueblo den un anochi di informacion

ORANJESTAD – Voluntario a duna oido na e yamada pa uni na Plataforma Ley di cacho. Diahuebs ultimo un total di riba 50 voluntario a presenta na e anochi di informacion pa informa nan mes miho riba e ley. Den un tempo cortico Plataforma a logra di informa pueblo riba e ley nobo di cacho cu ta drenta na vigor January 2015. E entusiasmo ta asina grandi cu hopi hende ta sigui e grupo di serca riba Facebook, radio como na television. Mirando cu comunidad ta kere cu mester bin un cambio y cu esaki ta e comienso a bin cu e peticion pa bira voluntario y asina por yuda na mehora e calidad di bida di e cachonan cu ta cana perdi riba nos isla. Tabata den Marriott Ballroom cu e grupo a splica tocante e ley y hende por a haci nan pregunta pa asina kita cualkier duda riba e cambionan cu ta na caminda. Entre nan, comisario Trudy Hassel, Veterinario, dog trainers, Ara y Animal Shelter tabata presente pa por a yuda duna informacion valioso riba kico lo pasa den e aña nobo. Hopi persona tabata precupa cu kisas e ley aki lo ta un inicio di un asina yama “killing machine”. Pero for di cuminsamento a duna di conoce cu tur voluntario presente den plataforma ta dog lovers y no dog killers. Alcontrario; e ley aki a inicia pa por alivia e conocido “afmaakhok”, y enves, lo ta pa educa hende nan pa bira doño nan responsabel. Despues di a papia riba ken ta plataforma, concientisacion di e ley, dog catching y multa di polis, a duna espacio pa pregunta y por a inscribi como voluntario. E grupo di Plataforma a keda felismente sorprendi cu casi tur esnan den e sala a lanta pa por papia cu e team y hasta inscribi pa yuda pa bin cu cambio. E grupo uni ta considera e hecho cu a comunidad ta reacciona cu mester bin cu mas cambio y mester considera mas aspecto di e ley caba como un paso positivo mirando cu esaki ta solamente e inicio. Apesar cu falta 6 siman pa aña nobo drenta e grupo tin hopi mas plan pa ehecuta pa yuda e pueblo ricibi e ley nobo di cacho. Pa esnan cu no a logra atende na e reunion ainda por inscribi pa medio di inbox Plataforma ley di cacho su Facebook page. Pa mas informacion por bishita e website: www.plataformaleydicacho.org.