Cambio di ley di LAFT ta riba agenda pa RMR otro siman

ORANJESTAD – E cambio di ley di LAFT ta riba agenda di Rijksministerraad di Hulanda di otro siman 30 di augustus. Esey a keda confirma pa Prome Minister, Evelyn Wever, na NoticiaCla.com diahuebs durante conferencia di prensa. Pero no tin un decision ainda, kico pa haci cu ne na Aruba. “Nos ta den deliberacion cu Hulanda ainda. Nos no ta completamente afo, pero mi tin contacto si cu e secretario di estado (pa Asuntonan di Reino, Raymond Knops:red) y mi tin tur confiansa cu nos ta sali afo,” Wever a bisa. Un posibel accion di parti di Hulanda pa e fecha ey, e mandatario di Aruba no por a confirma. Esta, si Hulanda ta cla pa tuma un paso caba contra Aruba. 

LEY PEGA

For di momento cu e ley a pasa den Parlamento na comienso di juni, e ley ta pega. Esaki den sentido, cu no a ‘bekrachtigd’e ley, esta e no ta firma pa Gobernador di Aruba ni gobierno di Aruba. Tanten esey no sosode, e ley no por drenta na vigor. Esey ta hinca Parlamento den un spot fastioso, pasobra ta minando e poder di e poder legislativo di Aruba. Di otro banda, lider di fraccion di MEP, Rocco Tjon, a declara na prensa, cu mientras cu e ley no a pasa ainda, nan ta warda riba kico t’ey sosode. Pues dunando indicacion cu no tin problema cu ainda e ley no a drenta na vigor. E cambio di ley a haya asina hopi atencion, debi cu e cambionan proponi y aproba, ta exclui Hulanda full for di e ley y ta duna Parlamento tur autoridad en bes di e Colegio di Supervision Financiero. Algo cu Hulanda no por acepta. Hulanda a laga sa caba, cu nan no ta di acuerdo cu e contenido di e ley nobo y kier pa Aruba ahusta esaki. A confirma tambe (esta Hulanda) cu Gobernador lo no firma e ley (pensamento di Hulanda), tanten cu e ta den e formato cu cual el a pasa den Parlamento. Tin pensamento cu si Aruba firma e ley, por spera problema y confrontacion cu Hulanda. 

RMR

Tabata prome cu recess cu gobierno di Aruba a splica NoticiaCla.com cu no tin nada na caminda pa Aruba, esta den forma di un KB of Aanwijzing, pero a indica si cu enberdad esey ta, pasobra e ley nobo di LAFT no a wordo firma ainda. Unabes cu firm’e, e ora por spera eventual problema cu Hulanda. Y tabata durante e ultimo reunion di RMR di 5 di juli, cu Prome Minister Wever na Hulanda a pidi tempo, pa atende cu esaki y laga recess pasa. Hulanda a bay di acuerdo y a pospone e tratamento di e ley te despues di recess, cu ta 30 di augustus proximo. 

VARIOS SCENARIO

Wever a bisa Noticiacla.com cu tin diferente scenario cu ta discuti entre Hulanda y Aruba pa cu e ley y ainda no ta mucho cla kico exactamente lo haci cu e ley aki y ki formato por uza, pa tur partido ta contento. Te cu awor, esey no tabata mucho cla pa cual Wever no por a duna un contesta mas concreto di kico e plannan ta, ni kico lo pasa dia 30 di augustus proximo. “Den e siguiente dia e ta bay haya forma, cu mi por duna mas informacion” Wever a bisa. Riba e pregunta cu por bin un rijkswet financieel toezicht, Wever a bisa cu e no ta papiando di un ley asina y lo tin cu mira kico ta para den e rijkswet pa e por comenta riba dje. “Entre ami cu Knops nos no a papia niun momento so di un rijkswet” Wever a sigui bisa.