Kiwanis Club of Palm Beach cu actividad pa promove ‘childseat’ den trafico

ORANJESTAD  – Kiwanis Club of Palm Beach ta anuncia cu riba diasabra 24 di augustus lo tin un actividad pa promove e uzo di ‘childseat’ den trafico na Aruba. Un ‘childseat’ ta un asiento di auto pa baby of mucha chikito, cu ta protega e mucha den caso di accident den trafico.

E actividad ta diasabra atardi. Pa 3.30 pm lo cuminsa reparti sticker di conscientisacion di uzo di ‘childseat’ riba L.G. Smith Boulevard na altura di oficina di Aruba Tourism Authority (ATA). Esaki lo pasa den coordinacion cu y bou supervision di Cuerpo Policial. Pa 5.00pm lo tin un actividad na Neptali Henriquez Park, caminda Kiwanis Palm Beach lo haci entrega di 25 ‘childseats’ na e famianan di menos recurso den nos comunidad. Tambe den medio di comunicacion lo manda e mensahe pa promove e uzo di ‘childseat’ pa baby y mucha chikito. E campaña di conscientisacion aki ta dedica na protega e futuro di nos muchanan y ta un “signature project” di Kiwanis Palm Beach, cu a lanza durante e aña Kiwanistico 2001- 2002, e tempo ey bou di Presidencia di FK Serge Mansur.

Kiwanis Club of Palm Beach Aruba ta forma parti di Kiwanis International, un organisacion mundial di voluntario dedica na cambia mundo, cuminsando na un comunidad y un mucha. Nos ta un organisacion den crecimento, dedica na yuda e muchanan di mundo henter, hisando nan calidad di bida.

Pa mas informacion di Kiwanis Club of Palm Beach bishita nos webpage na www.kiwanispalmbeach.com of nos Facebook Page na https://www.facebook.com/kiwanispalmbeach.