Wever: Richard Arends tin te diabierna pa produci prueba di carta di retiro na RdA

ORANJESTAD – “Si pa diabierna awor Parlamentario Richard Arends no presenta su carta di retiro pa su funcion di director financiero na Refineria di Aruba (conforme un contracto cu lo tin), gobierno di Aruba como accionista di e compania, lo instrui e compania pa cuminsa e proceso di retiro ‘oficial’ contra e awor parlamentario di partido AVP”. Asina Minister Presidente Evelyn Wever Croes a bisa Noticiacla.com durante e conferencia di prensa di gobierno. Segun Wever, e contracto aki, por hinca pais di Aruba den problema financiero serio, si e contracto resulta valido ainda. Ta trata di un contracto cu Arends a cera na 2016, pa e funcion di director financiero, pero cu manera e mes a bisa, nunca no a materialisa, pasobra el a opta pa tuma e oferta di bira Minister di Economia despues. 

E SITUACION

Wever a toca e tema cu for di dialuna ta den comunidad, esta e contracto di Arends cu a sali den publicidad, ora cu un parlamentario di MEP a publica esaki. Ta trata di e contracto cu na 2016, e awor parlamentario Arends a cera cu RdA, y a confirma esaki tambe na e portal aki dialuna. Sinembargo, Arends a sigura e portal aki, cu el a entrega su retiro dos siman, despues cu el a firma esaki. Sinembargo, no por reproduci e carta aki como prueba. Y esaki ta e problema segun Wever. A pidi e parlamentario produci esaki, pero cu 3 dia despues, ainda Arends no a haci esaki. 

CONSECUENCIA

Segun Wever, e contracto ta hinca den otro di tal forma, cu si Arends dicidi di activa esaki, e por costa gobierno 2.6 miyon florin (ekivalente na 5 aña di salario segun contracto y calculacion di gobierno). Esey segun Wever, ta placa cu pueblo tin cu bay paga y cu no tin aworaki. Mientras cu Arends ta sigura cu e no por claim loke e no a eherce, Wever ta pensa diferente. Y mirando cu no por produci e carta ainda, ta pone pensa, cu no tin un carta. E mandatario no ta dispuesto pa warda mas largo y como tal ta duna e parlamentario te cu diabierna, sino otro siman e ta tuma e paso ya menciona. 

ARENDS

Arends mientrastanto a sigura e portal aki, cu tin un carta di retiro y cu e ta entrega na RdA. E ta buscando e contracto pa por produci esaki pa e portal aki como prueba. Noticiacla.com sinembargo no a haya esaki y riba pregunta ki ora ta haya esaki, a bisa cu esaki lo tuma lugar ‘na su debido tempo’.