Insel Air Aruba ta laga 11 pasahero rabia atras na Surnam

PARAMARIBO – Insel Air Aruba a laga 11 pasahero atras cu pasashi ‘ok’ na Surnam diasabra mainta, causando problema na aeropuerto Zanderij. E buelo tabata ‘overbookt’ cu a pone cu e pasaheronan, no obstante ‘confirma’, toch no por a biaha. CEO di e compania na Aruba, Frederick Nuboer a confirma na NoticiaCla.com cu enberdad e pasaheronan a keda laga atras. E ta considere sinembargo un fayo di e sistema di reserva cu ta wordo uza na e.o. Surnam, esta SITA (Sociéte Internacionale de Télécommunications Aéronautiques) y no directamente ta un fayo di Insel Air. Pero segun Nuboer, e aerolinea ya a tuma paso necesario y a boek tur e pasaheronan riba e proximo buelo diadomingo mainta pa Aruba. “Nos ta investigando pakico e agencia di biahe a haci loke a sosode y pa e sistema no haci e fayonan ey mas” Nuboer a sigui bisa.

Segun splicacion di Nuboer, ora cu un pasahero boek un buelo cu ta yen, e agencia ta haya como respuesta un asina yama code di UK, cu ta nifica cu e buelo pa e pasahero no ta confirma. No obstante esey, e sistema SITA ta permiti e agencia di biahe, produci un pasashi cu e code di HK, cu ta nifica OK. Segun Nuboer, e ta un ‘glitch’ den e sistema cu tin cu wordo coregi.

E website Persbureau Curacao ta raporta cu segun Starnieuws di Surnam, e pasaheronan mester a raporta na e aeropuerto for di 4’or y bin tende cu no tin lugar riba e buelo pa Aruba. Algun di e pasaheronan cu pasashi na man, no tabata aparece mes riba e lista di pasahero. Un otro grupo a compronde cu no tabatin lugar mas riba e buelo, siendo cu nan si tabata riba e lista.

E pasaheronan rabia mesora a dicidi di entrega un keho contra Insel Air. “ta un shock teribel y drama ora cu esaki sosode. E pio ta ora cu ningun hende bisabo algo of splica bo riba un manera drechi, kico mester sosode despues. E unico cu nos a tende ta cu no tin lugar mas y cu tin cu tuma contacto cu Insel Air Corsou” abogado Samanta Gadjradj, cu tabata biaha hunto cu su ruman homber, a bisa. Nan lo mester a bay celebra cumpleaño di su ruman na Aruba. Segun Nuboer, nan a wordo atendi mientrastanto, manera informa anteriormente.

Loke a sosode segun Gadjradj, ta cu ora cu e avion mester a lanta, esnan laga atras a crea panico. “Tabatin diripiente 4 lugar liber. Tres damas por a bay, y un homber cu no tabata ni riba e lista. For di un grupo di pasahero, algun si por a aborda, un mama cu dos yiu chikito, pero esey a bai dificil ya cu e biahe tabata geboekt pa e grupo y tur otro informacion manera reservacion di hotel, tabata riba nomber di un pasahero pa cual no tabatin lugar abordo. Despues di hopi drama y zundramento, e avion a lanta buelo pa 8’or di mainta. Representante di InselAir Aruba na Surinam ta cla pa juda pasaheronan na number +597 8269919.