Sonja Velthuizen ta anuncia retiro oficial como directora di KvK

ORANJESTAD – Camara di Comercio y Industria Aruba (KvK) a informa oficialmente diaranson pa medio di un comunicado, cu su directora sra. Sonja Velthuizen a tuma su retiro algun siman atras. E motibo ta pa rason personal. Sra. Velthuizen a dicidi cu despues di 8 aña na KvK, di cua e ultimo 4 añanan el a funciona como directora di KvK, e ta bay pa un reto nobo. Sra. Velthuizen a informa KvK di su decision cu basta luna di aviso, pa KvK por tin tempo pa apunta un director nobo.

RETO NOBO DEN SECTOR PRIVA

Sra. Velthuizen lo continua su carera den sector priva. E no tabata un decision facil pa sra. Velthuizen. mirando cu den transcurso di e añanan cu el a traha na KvK, el a crece y bira un persona hopi respeta y admira pa su maneho. Como directora di KvK e tabata semper na vanguardia di e empresario local y e ta yuda trece sector priva y sector publico mas cerca otro pa bienestar di comercio di Aruba. Tambe el a hisa e perfil internacional di KvK cu entre otro e organisacion di Kamers van Koophandel di Caribe Hulandes, e relacionnan productivo cu KvK di otro pais di region y Merca y tambe participacion na e eventonan internacional, cu a yuda trece innovacion den KvK. E coleganan y directiva di KvK sigur ta desea sra. Velthuizen hopi exito y ta gradici Sonja Velthuizen pa tur e experiencia y conocemento, cu a comparti den e ultimo añanan.