Avianca a reduci nan flota considerablemente cu benta di 14 avion

BOGOTA – E aeroliña Colombiano Avianca, bou di maneho di Avianca Holdings, a anuncia cu nan lo sigui reduci nan flota pa fin di e aña aki, cu anuncio di benta di 14 avion. E compania basa originalmente na Panama, a anuncia cu nan a yega na un acuerdo, pa bende 10 avion A318-100 y 4 A320 na e compania basa na New York, FTAI Aviation pa un suma total di 150 miyon dollar. E benta ta sosode fin di e aña aki.  Como parti di e cambio di e aeroliña, nan a laga 17 A320 airbus bay y a suspende compra di 35 otro avion, entre 2019 y 2022, scapando e aeroliña di 2.6 biyon dollar. Na juni ultimo, el a retira 10 di su avionnan E190 tambe.