Universidad di Aruba a cuminsa cu programa di estudio OGM

ORANJESTAD - Dialuna 19 di Augustus ultimo e aña academico 2019-2020 di Universidad di Aruba (UA) a cuminsa pa e studiantenan di Organization, Governance and Management (OGM). 

Anualmente ta cuminsa cu un programa di introduccion pa tur studiante di OGM cu e titulo “Back-to-Study-Days”. E actividad aki ta un programa di dos dia, caminda tur studiante ta haya informacion general, pa por tin un aña exitoso. E prome dia (13 di Augustus) a duna un introduccion na tur studiante di prome aña.  E studiantenan den prome aña a haya informacion general pa nan por cuminsa nan “bida” di studiante na Universidad di Aruba. 

Riba e di dos dia, esta dialuna ultimo, tur studiante a haya informacion di e curiculo,e reglanan di examen y e reglanan di registracion pa examen. Tambe a tene un ‘mercado’ di modulo, caminda cada modulo tin su seccion y e docentenan a duna un resumen di e modulo y e tarea (nan) final pa e studiantenan por haya interes y ta mas prepara pa cuminsa.  Ademas di e modulonan, e studiantenan a haya informacion di OGM club pa studiante (StuCo) y e studiante Sidney Simoons a presenta e siguiente evento di e club, cu ta un biahe educacional pa Washington DC na october 2019. 

Tur aña tin un ‘’motivational speaker’’ y e aña aki e motivational speaker tabata Diego Acevedo. Sr. Acevedo a trata tres tema cu ta curiosidad, pasion y perseverancia. Tambe el a papia di e necesidad pa desplega curashi den bida, pa logra bo pasion-, soño- y metanan. Den su caso el a laga su trabou riba nivel internacional como ingeniero, anto el a dicidi di bay bek scol y studia sostenibilidad. Cu sosten y comprension di su casa el a bay bek scol y awor e tin su propio compania cu cliente internacional. Na final di su discurso Sr. Acevedo a pidi e studiantenan pa haci bon uzo di e oportunidad cu e estudio di OGM ta brinda nan. Tambe Sr. Acevedo a enfatisa, cu nos tur por impacta mundo di un manera of otro. El a bisa tambe cu bida no ta un careda cu un hende so ta gana. Ora cu un hende gana si nos hacie corecto, nos tur ta gana. El a pidi e studiantenan pa analisa tur cos cu nan por siña, pa na ta critico y pa nan compronde cu no ta tur hende, ta pensa mescos.